مەرسىندىن كەلگەن «رەھبەر»نىڭ باش تەرىپىدىكى «مۇھىم مەسىلە» نامىدىكى يىگىرمە ئۈچ ۋە يىگىرمە تۆتىنچى بەتلەرنىڭ چىقىرىلىشىنى ئۇيغۇن كۆردۈم. چۈنكى«نۇر»دىكى مۇھىم بىر مەسلەك شەپقەت بولغانلىقتىن(ئەرلەردىن كۆپرەك) ئاياللار ھەم سەمىمىي، ھەم ئىخلاسلىق ھالدا «نۇرلار» بىلەن ھەقىقىي ھالدا ئالاقىدار بولىشىۋاتىدۇ. بۇ ئىككى بەتتىكى قاتتىق تەبىرلەردىن، شەپقەت قەھرىمانلىرى بولغان ئۇ مۇبارەك ھەدە–سىڭىللىرىمىز دىققەت نەزىرىگە ئېلىۋېلىپ قايغۇرۇشمىسۇن. چۈنكى بۇ مەسىلە ئىستانبۇلدەك يەرلەردە يېرىم يالىڭاچ، رۇم ۋە ئەرمەنى قىزلىرىنى دوراشنى خالىغان بىر قىسىم مۇسۇلمان قىزلىرىنى ئەسكەرتىش ئۈچۈن يېزىلغانىدى.

  ھالبۇكى بۇ «رەھبەر»گە قارشى چىققان ئىستانبۇلدىكى مۇناپىقلار ۋە كاپىرلار، ھەمدە بۇ يېقىنقى ۋاقىتلاردىكى بىزگە قارشى چىققان بەزى گېزىتلەر بۇ نۇقتىغا خاتا مەنە بېرىشىپ، بىر قىسىم ئاياللارنىڭ رىسالەئى نۇرغا بولغان ئالاقىلىرىنى ئاجىزلىتىش ئۈچۈن، تۆھمەت قىلشقا سەۋەب بوپتۇ. ھازىرچە بۇ ئىككى بەت چىقىرىلسۇن. ئۇنىڭ ئورنىغا «ئاياللار بىلەن سۆھبەت» نامىدىكى «ئاياللار رەھبىرى» قويۇلسۇن.

سەئىد نۇرسى

* * *

  ئەسكەرتىش: بىر زامان ئىسلامىيەت تەربىيىسىگە قارشى چىققان مەخپىي كومىتېتلەر، ياشلارنى بۇزۇشقا ھەرىكەت قىلغىنىدەك، ھازىرمۇ بىچارە ئاياللارنى يولدىن چىقىرىش ئۈچۈن بەزى دىنسىز ۋە مەخپىي كومىتېتلەر ھەرىكەت قىلىشماقتا. بۇ بۇزغۇنچى كومىتېتلەرنىڭ تۆھمەتلىرىگە سەۋەب بولۇپ قالماسلىق ئۈچۈن، قوللىرىدا «ياشلىق رەھبىرى» بولغانلارغا يۇقىرىدىكى بايان بىر پارچىدىن بېرىلسۇن.

  ئاياللارمۇ چىقىرىلغان ئۇ ئىككى بەت ئورنىغا «ئاياللار بىلەن سۆھبەت» نامىدىكى ياشانغان ۋە ياش ئاياللارنىڭ رەھبىرىنى ئوقىسۇن ۋە چىقىرىلغان ئىككى بەتنىڭ ئورنىغا ئۇستازىمىزنىڭ يۇقىرىدىكى بايانى قوشۇپ يېزىلسۇن.

* * *

كۈتۈلمەستىن ئەسكەرتىلگەن بىرمۇھىم مەسىلە

  ئاخىرزامان فىتنىسىدە ئەڭ قورقۇنچلۇق رول ئوينىغان ئاياللار تائىپىسى ۋە ئۇلارنىڭ فىتنىسى ئىكەنلىكى ھەدىس رىۋايەتلىرىدىن كۆرۈلمەكتە. شۇنداق، تارىخلاردا، بۇرۇنقى زامانلاردا «ئامازونلار» نامىدىكى ناھايىتى جەڭگىۋار قوراللىق ئاياللاردىن تەشكىللەنگەن بىر ئەسكەر تائىپىسى ئاجايىپ ئۇرۇشلارنى قىلغانلىقى سۆزلىنىدۇ.

  دەل شۇنىڭغا ئوخشاش، بۇ زاماندىكى كاپىرلىق زالالىتىنىڭ ئىسلامىيەتكە قارشى ئاچقان جېڭىدىن، نەفسى ئەممارىنىڭ^ پىلانى بويىچە شەيتان قوماندانلىقى ئاستىدىكى پىرقىلارنىڭ ئەڭ قورقۇنچلىقى، يېرىم يالىڭاچ ئاياللاردۇركى، دەھشەتلىك پىچاقلاردەك، ئوچۇق پاچاقلىرى بىلەن مۆئمىنلەرگە قارشى تاجاۋۇز قىلىشماقتا. نىكاھ يولىنى تاقاپ، پاھىشە يولىنى كىڭەيتىشكە ھەرىكەت قىلىپ، كۆپلىگەن كىشىلەرنىڭ نەفىسلىرىنى ئوڭايلا ئەسىر قىلىپ، چوڭ گۇناھلار بىلەن قەلب ۋە روھلىرىنى يارىلىماقتا. ھەتتا ئۇ قەلبلەردىن بىر قىسمىنى ئۆلتۈرمەكتە. بىر قانچە يىل ھاياتىدا نامەھرەم يەرلىرىنى ھەۋەسكارانە كۆرسىتىشنىڭ جازاسى تۈرىدە، بۇ پىچاقلىق پاچاقلار جەھەننەمنىڭ ئوتۇنلىرى بولۇپ، ئەڭ ئاۋال بۇ پاچاقلار كۆيىدۇ. ھەمدە دۇنيالىق ئىشەنچ ۋە ساداقەتنى يوقاتقانلىقى ئۈچۈن يارىتىلىشىدىن ھەقىقىي خالىغان ۋە تەبىئىتىدىن كۆپ مۇھتاج بولغان ئەرنىمۇ تاپالمايدۇ. تاپسىمۇ بېشىغا بالا تاپىدۇ. ھەتتا بۇ ھالنىڭ نەتىجىسىدە، ئۇ ئاخىرزاماندا بەزى يەرلەردە نىكاھنى رەت قىلىش ۋە رىئايە قىلماسلىق يۈزىدىن قىرىق ئايالغا بىر ئەر قارايدىغان دەرىجىدە، ئۇ ئاياللار ئەھمىيەتسىز، ئىگىسىز، قىممەتسىز بىر ھالەتتە قالىدىغانلىقى ھەدىس رىۋايەتلىرىدىن كۆرۈلمەكتە.

  ھەقىقەت ئەنە شۇنداق. ئەمەلىيەتتە ھەر گۈزەل گۈزەللىكىنى سۆيىدۇ ۋە قولىدىن كەلگىنىچە مۇھاپىزەت قىلىشنى خالايدۇ، بۇزۇلىشىنى خالىمايدۇ. ھەمدە گۈزەللىك بىر نىمەتتۇر. نىمەتكە شۈكۈر قىلسا ئارتىدۇ، قىلىنمىسا ئازىيىدۇ، يامانلىشىدۇ. ئەلۋەتتە ئەقلى بار بولسا، ھۆسن ۋە جامالىنى، ئۆزىنى ۋە باشقىلارنى گۇناھلارغا ئىتتىرىشتىن، شۇنداقلا ئۇنى يىرگىنچلىك ۋە زەھەرلىك قىلىشتىن ساقلاپ ئۇ نىمەتنى، تۇزكورلۇق قىلىپ ئازاپقا سەۋەب بولىدىغان بىر نەرسىگە ئايلاندۇرۇپ قويۇشتىن پۈتۈن كۈچى بىلەن قېچىشى كېرەك.

  ھەمدە ئۇ فانىي(ۋاقىتلىق) بەش–ئون يىللىق گۈزەللىكنى باقىي قىلىش ئۈچۈن ھالال بىر شەكىلدە قوللىنىش ئارقىلىق، ئۇ نىمەتلەرگە شۈكۈر قىلش كېرەك. بولمىسا ياشانغاندا ئۇزۇن ۋاقىت پەس كۆرۈلۈشكە دۇچار بولۇپ، مەيۈس ھالدا يىغلاپ قالىدۇ.

  ئەگەر ئىسلام تەربىيىسى دائىرىسىدە، قۇرئاننىڭ ئەدەپ–ئەخلاق زىننىتى بىلەن ئۇ جامال گۈزەللەشتۈرۈلسە، ئۇ فانىي ھۆسۈن مەنىۋى جەھەتتىن باقىي قالىدىغانلىقى ۋە جەننەتتە ھۆرلەرنىڭ جامالىغا قارىغاندا، تېخىمۇ شىرىن، تېخىمۇ پارلاق بىر سۈرەتتە ئۆزىگە بېرىلىدىغانلىقى ھەدىسى شەرىفلەردە قەتئىي تۈردە ئېيتىلغان. ئەگەر ئۇ گۈزەلنىڭ زەررىچىلىك ئەقلى بولسا، بۇ گۈزەل، پارلاق ۋە ئەبەدىي نەتىجىنى قولدىن قاچۇرماسلىقى كېرەك.

اَلسَّلاَمُ عَلَيْكُمْ وَ رَحْمَةُ اللّٰهِ وَ بَرَكَاتُهُ

بەكمۇ ئەزىز، بەكمۇ مۇبارەك ۋە بەكمۇ شەپقەتلىك ئۇستازىمىز!

  ئۆتمۈشتە شۇنچىلىك ئاچچىق، شۇنچىلىك زۇلمەتلىك كۈنلەرنى باشتىن كەچۈرگەنىدۇق. ھەتتاكى، بالىلىرىمىزنىڭ قۇرئان دەرسىگە بېرىشىمۇ چەكلەنگەن ئىدى. مەكتەپلەردىمۇ دىن دەرسلىرى چىقىرىۋېتىلگەن ئىدى. رىسالەئى نۇرنى يازغانلارنى سوت مەھكىمىلىرىگە تاپشۇرۇپ بېرەتتى. تولىمۇ مۇبارەك ئۇستازىمىز بولغان سىزگە، دىن دۈشمەنلىرى كۆپ ئەزىيەتلەرنى بەردى. كۆپ جاپالارنى چەككۈزدى. «رىسالەئى نۇرنى يازدى، دىننى قايتىدىن كۈچلەندۈرىۋەتتى، مۇسۇلمانچىلىقنى راۋاجلاندۇرىۋەتتى» دەپ، سىزنى ئۆلۈمگە مەھكۇم قىلىشقا ئۇرۇندى. بىز ئۇ ئېچىنىشلىق كۈنلەردە يىغلىدۇق، قايغۇردۇق. «يا رەببى! ئۇستازىمىزنى مۇھاپىزەت قىل. دىنىمىزغا، ئۇستازىمىزغا، رىسالەئى نۇرغا دۈشمەنلىك قىلغانلارغا قەھرىڭنى كۆرسەت!» دەپ ﷲقا يالۋۇراتتۇق. كۆزلىرىمىزدىن گوياكى قان ئارىلاش ياشلار تۆكەتتۇق. ئاخىرى جانابى ھەق سىز ئۇستازىمىزنى مۇھاپىزەت قىلدى؛ دىنسىزلار يىقىلدى. مۇسۇلمانلىقنى يوق قىلىشنى قەست قىلغانلار پەرىشان بولدى. سىز ئۇستازىمىز، دىنىي خىزمىتىڭىزدە مۇزەپپەر بولدىڭىز. خەلقىمىزنى دىنسىزلارنىڭ شەررىدىن قۇتۇلدۇردىڭىز، غەلىبە قازاندىڭىز. مۇسۇلمانلارنىڭ بەختىيار كۈن كەچۈرۈشىگە سەۋەپچى بولدىڭىز. بۇنىڭ بىلەن بىز دىنىي ئەركىنلىكىمىزگە، دىنىي ھۆرلىكىمىزگە ئېرىشتۇق. رىسالەئى نۇر مەتبۇئاتلاردا كۆپلەپ بېسىلىشقا باشلىدى، بىز ئاياللار ناھايىتى سۆيۈندۇق. نۇرلىرىمىزنىڭ بېسىلغانلىقىنى كۆرگىنىمىزدە، يېڭىدىن دۇنياغا كەلگەندەك سۆيۈنچلەرگە تولدۇق. بىزگە مىڭلاپ زىبۇ–زىننەتلەر، ئالتۇنلار، ئالماسلار بېرىلسىمۇ، يىپەكتىن، ئەتلەستىن كىيىملەر كىيدۈرۈلسىمۇ، بىزنى بۇنچىلىك دەرىجىدە مەمنۇن قىلالمايتتى. رىسالەئى نۇرنى باستۇرۇش، دىنغا ۋە ئىمانغا ئەڭ بىرىنچى، ئەڭ چوڭ خىزمەتتۇر.

قەدىرلىك ئۇستازىمىز!

  دىن، ئىمان ئىشقىدا، مۇسۇلمانلىق تۇيغۇسى بىلەنلا بەختىيار بولالايدىغان بىز ئانىلار، بالىلىرىمىزغا قۇرئانى كەرىمنى ئۆگىتىۋاتىمىز. رىسالەئى نۇر ئوقۇشقا ئۈندەۋاتىمىز. رىسالەئى نۇرنىڭ ئىمان، ئىسلامىيەت دەرسلىرى بىلەن تەربىيە قىلىشقا تىرىشىۋاتىمىز. ئۆيلىرىمىز بىردىن نۇر مەدرىسىسى بولىۋاتىدۇ، ئەلھەمدۇلىللاھ. ئەگەر بالىلىرىمىزغا رىسالەئى نۇر ئوقۇتمىساق، بۇ زاماننىڭ يولدىن چىقارغۇچى ھالاكەتلىرىگە چۈشىدۇ، يامان ئادەتلەرگە بېرىلىدۇ، يامانلىقلارنى تەقلىد قىلىدۇ. بىزنىڭ بېشىمىزغا بالا ۋە دەرت بولىدۇ. ئاخىرەتتىمۇ، «ئىمانىمىزنى نېمە ئۈچۈن قۇتقازمىدىڭلار؟» دەپ ئاتا–ئانىلىرىغا قارشى دەۋا قىلىدۇ. شۇنىڭ ئۈچۈن سۆيۈملۈك پەرزەنتلىرىمىزنىڭ قەلبلىرىگە رىسالەئى نۇر سۆيگۈسىنى سىڭدۈرىۋاتىمىز. ئاياللارنىڭ بالىلىرىغا قارىتا شەپقىتى كۈچلۈك. ئەگەر بالىلىرىنىڭ ئەبەدىي بولغان ئاخىرەتلىك ھاياتىنى قۇتقۇزىدىغان ئىمان دەرسلىرى بېرىلمەي، بۇنىڭغا سۇسلۇق قىلىنسا، پەقەت ۋاقىتلىق فانىي دۇنيا ھاياتى ئۈچۈنلا تىرىشتۇرۇلسا، ئۇ چاغدا بالىلىرىغا بولغان شەپقەت، ھەقىقىي ئورنىدا سەرپ قىلىنغان بولمايدۇ. بالىسىنىڭ ھەم دۇنيادا، ھەم ئاخىرەتتەبەختسىزلىكىگە سەۋەب بولىدىغان بىر شەپقەت بولۇپ قالىدۇ.

بالىلىرىمىزنى ئەركىلىتىپ، مۇھەببەت بىلەن ئۇلارغا دەۋاتىمىزكى:

  «بالام! رىسالەئى نۇر سېنى ھەم دۇنيادا، ھەم ئاخىرەتتە بەختلىك ۋە سائادەتمەن قىلىدىغان بەكمۇ بۈيۈك ھەقىقىي بىر دىن كىتابىدۇر، ئىمان دەرسلىرىدۇر. ئۇنى ئوقۇشتىن مەھرۇم قالساڭ، ئىمان دەرسلىرىنى ھازىر ئالمىساڭ، ھەم دۇنيادا، ھەم ئاخىرەتتە بەختسىز بولىسەن، ئازاپقا قالىسەن» دەپ، ھەمدە رىسالەئى نۇر ھەققىدە يېزىلغان مەكتۇپلارنى، ھېكايىلەرنى، قەسىدىلەرنى، شېئىرلارنى ئوقۇپ ۋە ئوقۇتۇپ، رىسالەئى نۇرغا بولغان مۇھەببەتنى قەلبلىرىگە، ئۇنىڭ يۈكسەكلىكىنى روھلىرىغا يەرلەشتۈرۈشتە داۋام قىلىمىز. دۇئالىرىڭىز سايىسىدا رىسالەئى نۇرنىڭ دەرسلىرى بىلەن، ئىنشائاللاھ ئەۋلادلىرىمىز ئىسلامىيەتكە، بىزگە ۋە خەلقىمىزگە خەيرلىك دىندار ياشلار بولۇپ يېتىشىدۇ.

مۇبارەك ئۇستازىمىز!

  سۆيۈملۈك رەببىمىزنىڭ ئۆز رەھمىتى بىلەن قەلبلىرىمىزگە قويغان مۇھەببەت ھېسسىنى، بىز ئۆزىمىزنى ئەبەدىي سائادەتكە ئېلىپ بارىدىغان ئىمان دەرسلىرى، رىسالەئى نۇر ۋە سىز ئۇستازىمىز يولىدا نېمە ئۈچۈن سەرپ قىلمايدىكەنمىز؟ خاتا يوللاردا سەرپ قىلساق، بىزنى دۇنيا ۋە ئاخىرەتتە ۋاي ئىسىت! دېگۈزىدۇ، ھەسرەتتە قالدۇرىدۇ. ھەتتاكى ئەبەدىييەن يىغلىتىدۇ. ئەگەر بالىلىرىمىزغىمۇ بۇ ئەھمىيەتلىك ھەقىقەتنى سىڭدۈرۈش بىلەن، ھەقىقىي شەپقىتىمىزنى سۇيىئىستېمال قىلماي كۆرسىتەلىسەك، ئانىلىق ۋەزىپىمىزنى ھەقىقىي تۈردە ئادا قىلغان بولىمىز.

  رىسالەئى نۇر ھەققىدە تولىمۇ گۈزەل دوكلاتلار، نۇرلۇق مەكتۇپلار ۋە ئىنتايىن ياخشى قەسىدىلەرنى ئۆز ئىچىگە ئالغان كىتابنى بۇرسا شەھرىدىن كەلتۈردۇق. ئوقۇغانسېرى، ئاڭلىغانسېرى ئىنتايىن سۆيۈنىۋاتىمىز، رۇھلىرىمىز شادلانماقتا. ئۇلارنى يازغان نۇر تالىپلىرى بولغان قېرىنداشلىرىمىزدىن ﷲ رازى بولسۇن، ئامىن…

اَلْبَاقِى هُوَ الْبَاقِى

دۇئايىڭىزغا مۇھتاج

ئىستانبۇل ئاياللىرى

]]> https://nurbuliqi.com/%d8%a6%d8%a7%d9%8a%d8%a7%d9%84%d9%84%d8%a7%d8%b1%d8%af%d9%89%d9%86-%d8%a8%d9%89%d8%b1-%d9%85%db%95%d9%83%d8%aa%db%87%d9%be-%d8%b3%d8%a7%d9%84%d8%a7%d9%85-%d8%ae%db%95%d8%aa/feed/ 0