قارشىسىدىكى تولۇق ئوتتۇرا مەكتەپنىڭ چوڭ قىزلىرى قورودا كۈلۈشۈپ ئۇسۇل ئويناۋاتاتتى. ئۇلارنى بۇ دۇنيا جەننەتلىرىدە جەھەننەم ھۆرلىرى ھۆكمىدە كۆردۈم. بىردىنلا ئەللىك يىل كېيىنكى ھالەتلىرى ماڭا كۆرۈندى. نەزىرىمدە ئۇلارنىڭ بۇ كۈلۈشلىرى ئەلەملىك ھالدا يىغلاش سۈرىتىنى ئالدى ۋە بىردىنلا بۇ ھەقىقەت ئېچىلدى، يەنى: ئەللىك يىل كېيىنكى ھاللىرىنى مەنىۋى ۋە خىيالىي بىر كىنو بىلەن كۆردۈمكى، ئۇ كۈلگەن ئاتمىش قىزدىن ئەللىكى قەبىردە ئازاپ تارتىشىۋاتاتتى، تەنلىرى تۇپراق بولۇشقان… قالغان ئونى بولسا يەتمىش ياشلىرىدا سەتلەشكەن بىر قىياپەتتە، ھەركىمنىڭ نەپرەت نەزىرىنى جەلپ قىلىۋاتاتتى. مەن ئۇلارنىڭ بۇ ھاللىرىغا يىغلىدىم. ئاخىرزامان فىتنىلىرىنىڭ ئەڭ دەھشەتلىكى ۋە جەلپ قىلارلىقى ئاياللارنىڭ يۈزسىز يۈزىدىن چىقىدىغانلىقىدىن ئىبارەت بىر ھەقىقەت ماڭا كۆرۈندى. شۇ سەۋەبلىك ئىختىيارىنى كونترولدىن چىقارغان ئىنسانلار پەرۋانىدەك گۇناھ ئوتىغا ئېتىلىدۇ، بىر مىنۇتلۇق دۇنيا ھاياتىنى، يىللارچە باقىي^ ھاياتىدىن ئۈستۈن كۆرىدۇ.

  بىر كۈنى مەن كوچىغا قاراپ، ئۇ فىتنىنىڭ تەسىرلىك بىر مىسالىنى سەزدىم. ياشلارغا بەكمۇ ئىچىم ئاغرىدى. «بۇ بىچارىلەر ئۆزلىرىنى ماگىنىتتەك تارتىۋاتقان بۇ جەزبىلىك فىتنىنىڭ ئوتىدىن قۇتقۇزالمايدۇ» دەپ ئويلىنىۋاتقاندا، بىردىنلا ئۇ فىتنە ئوتىنى ياندۇرغان ۋە ئۇنى ياقىلىغان دىنسىز بىر مەنىۋى شەخس ئالدىمدا پەيدا بولدى، مەنمۇ ئۇنىڭغا ۋە ئۇنىڭدىن دەرس ئالغان كاپىرلارغا دېدىم:

  –ئەي جەھەننەم ھۆرلىرى بىلەن لەززەتلىنىش يولىدا دىنىنى قۇربان قىلغان، كەيپ–ساپا زالالىتىنى سۆيۈپ ئەگەشكەن، نەفسانىي^* ھەۋەسلەرنىڭ لەززىتى يولىدا دىنسىزلىكنى ۋە كاپىرلىقنى قوبۇل قىلغان، ھەمدە بۇ ھاياتنى سۆيۈپ، ئۆلۈمدىن شىددەت بىلەن قورققان ۋە دىندىن يۈز ئۆرىگەن بەدبەخت!

   قەتئىييەن بىلكى، دىنسىزلىكىڭ ھۆكۈمى بويىچە، سېنىڭ بۇ يوغان دۇنيادىكى ھەممە نەرسەڭ ـــــ ئۆتكەن ۋە كېلەچەك زامانىڭ، ئۆتكەن تۈرلىرىڭ ۋە جىنسلىرىڭ، كېلىدىغان مەخلۇقلار ۋە نەسىللەر، كەتكەن دۇنيالار ۋە مىللەتلەر، كەلگەن ئىنسانلار ۋە تائىپىلەر بۇ سائەتتىن بۇرۇن ۋە بۇ مىنۇتتىن كېيىن تامام يوق ۋە ئۆلۈكتۇر. سەن ئىنسانىيەت ۋە ئەقىل ئارقىلىق ئالاقىدار بولغان ئۇ ئۆزگەرگەن پۈتۈن دۇنيالار ۋە ئاققان شەيئىلەر، سېنىڭ زالالىتىڭ سەۋەبلىك داۋاملىق ھالدا بېشىڭغا دۇنيا تولغۇدەك چەكسىز ئۆلۈملەرنىڭ دەھشەتلىك ئەلەملىرىنى ياغدۇرىدۇ. ئەگەر ۋىجدانىڭ بار بولسا، قەلبىڭنى ئۆرتەيدۇ. روھىڭ بار بولسا، كۆيدۈرىدۇ. ئەقلىڭ ئۆچمىگەن بولسا، غەملەر ئىچىدە تۇنجۇقتۇرىدۇ. ئەگەر بىر سائەتلىك مەستلەرچە كەيپ ۋە پاسكىنا لەززىتىڭ، بۇ چەكسىز غەملەرگە، قايغۇلارغا ۋە ئەلەملەرگە تەڭ كەلسە، ئۇ كەيپىڭدە قال… بولمىسا ئەقلىڭنى بېشىڭغا ئال! ئۇ مەنىۋى جەھەننەمدىن قۇتۇلۇش، ھەمدە ئىمان بۇ دۇنيادىمۇ تەمىنلىگەن بىر مەنىۋى جەننەتكە كىرىش ۋە ھاياتنىڭ بەخت–سائادىتىنى تېپىش ئۈچۈن، قۇرئاننىڭ دەرسىنى ئاڭلا… كىچىككىنە ۋاقىتلىق بىر مىنۇتلۇق لەززەتنى ئومۇمىي، باقىي، دائىمىي، ئىمانىي (ھاشىيە)^** لەززەتلەر بىلەن ئالماشتۇر…

  ھەمدە «ھاياتىمنى ھايۋاندەك ئۆتكۈزىمەن» دېمە. چۈنكى ھايۋان ئۈچۈن ئۆتكەن ۋە كېلەچەك زامان غەيپ ھۆكمىدىدۇر. جانابى ھەكىمى رەھىم^** غەيپنى بىلدۈرمەسلىك ئارقىلىق ئۇلارنى چەكسىز ئەلەملەردىن قۇتقۇزغان. ھەتتا سويۇش ئۈچۈن ياتقۇزۇلغان بىر توخۇ ھېچبىر ئەلەم ۋە قايغۇ ھېس قىلمايدۇ. پىچاق كەسكەن ۋاقىتتا، ئۇ قورقۇنچ ھېسسى كېلىدۇ–يۇ، دەرھال ئۇ ھېسمۇ كېتىدۇ، ئۇ ئەلەمدىن قۇتۇلىدۇ. دېمەك جانابى ﷲنىڭ ناھايىتى چوڭ ۋە مۇكەممەل شەپقىتى ۋە مەرھەمىتى غەيپنى بىلدۈرمەسلىكتۇر. بولۇپمۇ مەسۇم(گۇناھسىز) ھايۋانلار ئۈچۈن بۇ مەرھەمەت تېخىمۇ تولۇقتۇر. دېمەك، ھارام لەززەتلەردە سەن ھايۋانلارغا يېتىشەلمەيسەن. چۈنكى ھايۋان ئۈچۈن غەيپ بولغان نەرسىلەرنى سېنىڭ ئەقلىڭ كۆرىدۇ، ئەلىمىنى ئالىدۇ. غەيپ پەردىسى ئاستىدىكى تولۇق راھەتچىلىكتىن تامامەن مەھرۇمسەن.

  شۇنداقلا سېنىڭ ئىفتىخارىڭ بولغان قېرىنداشلىق، ھۆرمەت ۋە تۆھپىكارلىقتەك ئەڭ ياخشى خىسلەتلىرىڭ، كىچىككىنە بىر زامانغا يەنى، چوڭ بىر چۆلگە نىسبەتەن بىر بارماقچىلىك يەرگىلا خاس، ھەمدە چەكسىز زامان ئىچىدە پەقەتلا ھازىرقى سائەتكىلا مەخسۇس بولغانلىقتىن، سۈنئىي، ۋاقىتلىق، ساختا، ئاساسسىز ۋە ناھايىتى ئەرزىمەس بولۇپ، سېنىڭ ئىنسانىيىتىڭ ۋە كامالىتىڭ شۇنچىلىك نىسبەت بىلەن تۆۋەنلەيدۇ ۋە يوقىلىدۇ. لېكىن مۆئمىنلەرنىڭ قېرىنداشلىقى، ھۆرمىتى، مۇھەببىتى ۋە تۆھپىكارلىقى ئىمان نەزىرىدە مەۋجۇت بولغان ئۆتكەن ۋە كېلەچەك زاماننى ئىچىگە ئالغانلىقتىن ئىنسانىيىتىمۇ، كامالىتىمۇ شۇ بويىچە يۈكسىلىدۇ.

  سېنىڭ بۇ دۇنيادىكى مۇۋەپپىقىيەتلىرىڭ بولسا، ئالماسچى، بىراق ئەخمەق بىر يەھۇدىينىڭ شىشە پارچىلىرىنى ئالماس دەپ قاراپ، ئالماس نەرقى بويىچە ئالغىنىدەك، سەنمۇ كىچىككىنە، قىسقىغىنە بىر زامانغا، بىر ھاياتقا ئۇزۇن بىر ھاياتنى ئۇتىدىغان نەرقنى بەرگەنلىكىڭ ئۈچۈن ئەلۋەتتە يېڭىپ چىقىسەن. بىر مىنۇت ئۈچۈن خۇددى بىر يىلدەك قاتتىق ھېرىس، مۇھەببەت، ئىنتىقامدەك ھېسلىرىڭ بىلەن يۈگۈرگەنلىكىڭ ئۈچۈن دىندارلاردىن ۋاقىتلىق ئېشىپ چۈشىسەن.

  شۇنداقلا سېنىڭ ئەقلىڭ، روھىڭ، قەلبىڭ، تۇيغۇلىرىڭ يۈكسەك ۋەزىپىلىرىنى تاشلاپ، پەس نەفىس ۋە شەھۋانى ھەۋىسىڭنىڭ رەزىل ئىشلىرىغا قاتنىشىپ ياردەم قىلغانلىقتىن مۆئمىنلەرنى بۇ دۇنيادىكى چاغدا ئۇتۇپ چىقىسەن ۋە كۆرۈنۈشتە تېخىمۇ جەلپ قىلارلىق كۆرۈنىسەن. چۈنكى ئەقىل، قەلب ۋە روھلىرىڭ ئىنتايىن چىرىكلىشىپ، شەھۋانىي ھەۋەس ۋە رەزىل نەفىسكە ئۆزگەرگەن بولغاچقا، ئەلۋەتتە بۇ جەھەتتە، ساڭا جەھەننەمنى ۋە مۆئمىنلەرگە جەننەتنى ئېرىشتۈرىدىغان بىر ۋاقىتلىق ئۇتۇقۇڭ بولىدۇ.

——————————————————————————

*باقىي: ئەبەدىي، دائىمىي، ئۆلمەس. («فانىي»گە قارمۇ–قارشى سۆز)

**نەفسانىي: نەفىسنىڭ يامان ئارزۇلىرى بىلەن ئالاقىدار.

***(ھاشىيە): شۇنداق، ئىمان بۇ دۇنيادىمۇ مەنىۋى جەھەتتىن جەننەت لەززەتلىرىنى بىرەلەيدۇ. يۈزلىگەن لەززەتلىك نۇرلىردىن يالغۇز بۇ پايدىسىغا قارا. مەسىلەن: سەن ناھايىتى سۆيگەن بىرىنى بىر خەتەردە ئۆلىۋاتقان بىر پەيتتە كۆرگىنىڭدە، توساتتىن لوقمان ھەكىم ۋە خىزىرغا ئوخشىغان بىر دوختۇر كەلدى ۋە ئۇ تىرىلدى. سەن ئۇ چاغدا قانچىلىك سۆيۈنچ ھېس قىلىسەن. دەل شۇنىڭغا ئوخشاشلا، سەن سۆيگەن ۋە ئالاقىدار بولغان ئۆلگەنلەرنىڭ سانىچىلىك سۆيۈنچ ۋە خۇشاللىقلارنى ئىمان ساڭا تېتىتىدۇ. چۈنكى ئۆتكەن زامان مازارىستانىدا سەن سۆيگەن مىليونلارچە كىشىلەر يوقلۇقتىن ۋە ئۆلۈمدىن، بىردىنلا قۇتۇلۇپ، ئىمان نۇرى بىلەن سېنىڭ ئالدىڭدا تىرىلىدۇ. «بىز ئۆلمەپتۇق ۋە ئۆلمەيمىز» دەپ ھاياتلىنىدۇ. ئۇ چەكسىز ئايرىلىشلاردىن كەلگەن چەكسىز ئەلەملەر ئورنىغا، كۆرۈشۈش ۋە ھاياتلىنىش بىلەن چەكسىز لەززەتلەر، سۆيۈنچلەر ئىمان نۇقتىئىنەزىرى بويىچە بۇ دۇنيادىمۇ قولغا كېلىدۇ. مانا بۇ كۆرسىتىدۇكى: «ئىمان شۇنداق بىر ئۇرۇقتۇركى، ئەھلى ئىمان ئۈچۈن جەننەتنى بارلىق لەززەتلىرى ۋە ھۆسنلىرى بىلەن ئۆستۈرىدۇ ۋە بېرىدۇ…»

****ھەكىمى رەھىم: چەكسىز ھىكمەت ۋە چەكسىز شەپقەت ئىگىسى.-ت

يەتتىنچى مەكتۇپ

بِاسْمِهِ سُبْحَانَهُ ﴿وَاِنْ مِنْ شَيْءٍ اِلاَّ يُسَبِّحُ بِحَمْدِهِ﴾

اَلسَّلاَمُ عَلَيْكُمْ وَ رَحْمَةُ اللّهِ وَ بَرَكَاتُهُ اَبَدًا دَائِمًا

ئەزىز قېرىنداشلىرىم!

  مەندىن سوراش ئۈچۈن، شاملىق ھافىزغا ئىككى ئىشنى دەپسىلەر:

  بىرىنچىسى: «ھەزرىتى پەيغەمبەر ئەلەيھىسسالاتۇ ۋەسسالامنىڭ زەينەب بىلەن ئۆيلىنىشىنى، بۇرۇنقى زاماننىڭ مۇناپىقلىرىغا ئوخشاش، يېڭى زاماننىڭ زالالەت ئەھلىلىرىمۇ تەنقىدلەشكە ئۇرىنىۋاتىدۇ. نەپسانىي، شەھۋانىي دەپ قاراۋاتىدۇ.» دەپسىلەر.

  ئەلجاۋاب: يۈزمىڭ قېتىم ھاشا ۋە كەللا (ئەسلا ۋە ھەرگىز ئۇنداق ئەمەس)! ئۇ ئالىي قامەتكە ئۇنداق پەس شۈبھىلەرنىڭ قولى يەتمەيدۇ. شۇنداق، ئون بەش يېشىدىن قىرىق يېشىغىچە، ۋۇجۇدىدىكى ھارارەت كۈچلۈك ۋاقىتتا ۋە نەفسانىي ھەۋەسلىرى ئەۋج ئالغان زامانىدا، دوست ۋە دۈشمەنلىرىنىڭ بىردەك شاھىدلىقى بىلەن، مۇكەممەل ئىپپەت ۋە دەل ئىسمەت (گۇناھسىزلىق) بىلەن خەدىجەتۇل–كۇبرادەك (ر.ئەنھا) ياشىنىپ قالغان بىرلا ئايال بىلەن كۇپايىلەنگەن ۋە قانائەت قىلغان بىر زاتنىڭ؛ قىرىق ياشتىن كېيىن، يەنى ۋۇجۇدىدىكى ھارارەتنىڭ سۇسلىغان دەۋرىدە ۋە نەفسانىي ھەۋەسلەرنىڭ پەسەيگەن زامانىدا كۆپ ئاياللىق بولۇشى ۋە نىكاھلىنىشى، قەتئىي ۋە روشەن ھالدا نەفسانىي ئەمەسلىكىنى ۋە باشقا مۇھىم ھىكمەتلەرگە ئاساسلانغانلىقىنى، زەررىچىلىك ئىنسابى بارلارغا ئىسپاتلاپ بېرىدىغان بىر ھۆججەتتۇر.

  ئۇ ھىكمەتلەردىن بىرى شۇدۇركى: پەيغەمبەر ئەلەيھىسسالامنىڭ سۆزلىرىگە ئوخشاشلا، ئىشلىرى، ئەھۋاللىرى، مۇئامىلىسى ۋە ھەرىكەتلىرىمۇ دىن ۋە شەرىئەتنىڭ مەنبەسىدۇر، ئەھكاملارنىڭ ئاساسلىرىدۇر. ئۇنىڭ زاھىرىي قىسمىنى ساھابىلەر ئۆز زىممىسىگە ئالغىنىدەك، خۇسۇسىي دائىرىدە مەخپىي ئەھۋاللاردىن مەيدانغا كەلگەن دىننىڭ سىرلىرى ۋە شەرىئەت ئەھكاملىرىنىڭ ۋاستىچىلىرى ۋە رىۋايەت قىلغۇچىلىرى بولسا، پەيغەمبىرىمىزنىڭ (ئە.س.ۋ) پاك ئاياللىرىدۇر. ھەمدە ئۇلار ئۇ ۋەزىپىنى ئەمەلىي ئادا قىلدى. دىننىڭ سىرلىرى ۋە ئەھكاملىرىنىڭ ئاساسەن يېرىمى دېگۈدەك ئۇلاردىن كەلگەندۇر. دېمەك بۇ چوڭ ۋەزىپىگە كۆپلىگەن، شۇنداقلا خىلمۇخىل سۈپەت ۋە خىسلەتلەرگە ئىگە بولغان پاك ئاياللار لازىم ئىدى.

  ھەزرىتى زەينەبنى نىكاھىغا ئېلىشىغا كەلسەك، «يىگىرمە بەشىنچى سۆز»نىڭ بىرىنچى شۇلەسىنىڭ ئۈچىنچى شۇئاسىنىڭ مىساللىرىدا

﴿ مَا كَانَ مُحَمَّدٌ اَبَا اَحَدٍ مِنْ رِجَالِكُمْ وَلٰكِنْ رَسُولَ اللّٰهِ وَ خَاتَمَ النَّبِيِّينَ﴾

(ئەھزاب:40)

ئايىتىگە دائىر مۇنداق يېزىلغان ئىدىكى: ئىنسانلارنىڭ ئوخشىمىغان تەبىقىلىرىگە قارىتا، بىرلا ئايەت خىلمۇخىل جەھەتلەر بىلەن، ھەربىر تەبىقىنىڭ چۈشىنىشىگە يارىشا ئايرىم–ئايرىم مەنالارنى ئىپادە قىلىدۇ. بىر تەبىقىنىڭ يۇقىرىقى ئايەتتىن چۈشىنىدىغان ئۈلۈشى شۇدۇركى: رەسۇلى ئەكرەم ئەلەيھىسسالاتۇ ۋەسسالامنىڭ خىزمەتكارى ۋە «ئوغلۇم!» دېگەن خىتابىغا سازاۋەر بولغان زەيد (ر.ئە)، سەھىھ رىۋايەت بويىچە، ئۆز ئېتىراپىغا بىنائەن، ئىززەتلىك جۈپتىگە ئۆزىنى مەنىۋى جەھەتتىن كۇفۇۋ (مۇناسىپ) كۆرمىگەنلىكى ئۈچۈن تالاق قىلغان. يەنى، ھەزرىتى زەينەب ئالاھىدە يۈكسەك بىر ئەخلاقتا يارىتىلغان ۋە بىر پەيغەمبەرگە ئايال بولىدىغان تەبىئەتتە ئىكەنلىكىنى، زەيد (ر.ئە) پاراسىتى بىلەن ھېس قىلغان، ھەمدە ئۆزىنى ئۇنىڭغا ئەر بولالايدىغان بىر مۇناسىپ تەبىئەتتە كۆرمىگەنلىكتىن، مەنىۋى جەھەتتىن قاملىشالماسلىققا سەۋەب بولغانلىقى ئۈچۈن تالاق قىلغان. ﷲنىڭ ئەمرى بىلەن رەسۇلى ئەكرەم ئەلەيھىسسالاتۇ ۋەسسالام ئۆز نىكاھىغا ئالغان. يەنى ﴿زَوَّجْنَاكَهَا﴾ نىڭ ئىشارىتى ۋە ئۇ نىكاھنىڭ بىر ساماۋىي باغ ئىكەنلىكىگە دالالەت قىلىشى بىلەن؛ نىكاھ بېغى ئالاھىدە بىر تەرزدە، ئادەت ۋە زاھىرىي مۇئامىلىلەردىن ھالقىغان بىر سۈرەتتە، پەقەت تەقدىرنىڭ ھۆكۈمى بىلەن بولغانكى، رەسۇلى ئەكرەم ئەلەيھىسسالاتۇ ۋەسسالام تەقدىرنىڭ ئۇ ھۆكۈمىگە بويسۇنغان ۋە مەجبۇر بولغاندۇر. نەفسنىڭ ئارزۇسى بىلەن ئەمەستۇر. تەقدىرنىڭ بۇ ھۆكۈمىمۇ، ئەھمىيەتلىك بىر شەرئىي ھۆكۈمنى ۋە مۇھىم بىر ئومۇمىي ھىكمەتنى ۋە كەڭ دائىرىلىك بىر ئاممىۋىي پايدىنى ئۆز ئىچىگە ئالغان بولۇپ،

﴿لِكَىْ لاَ يَكُونُ عَلَى الْمُؤْمِنِينَ حَرَجٌ فِى اَزْوَاجِ اَدْعِيَائِهِمْ﴾

(ئەھزاب:37)

ئايەتى كەرىمىسىنىڭ ئىشارىتى بىلەن: يېشى چوڭ كىشىلەرنىڭ كىچىكلەرنى «ئوغلۇم» دېيىشلىرى، زىھار مەسىلىلىرىدەك، يەنى ئايالىغا «ئانامدەكسەن» دېسە ھارام ھىسابلانغاندەك ئەمەستۇر. شۇڭا ھۆكۈم بۇنىڭ بىلەن ئۆزگەرمەيدۇ. ھەمدە، چوڭلارنىڭ قول ئاستىدىكىلەرگە ۋە پەيغەمبەرلەرنىڭ ئۈممەتلىرىگە ئاتىلارچە نەزىرى ۋە خىتابلىرى، پەيغەمبەرلىك ۋەزىپىسى جەھەتى بىلەندۇر. ئىنسانىي شەخسىيىتى جەھەتتىن ئەمەستۇر. ئۇنداقتا قانداقمۇ ئۇلاردىن ئۆيلىنىشى ئۇيغۇن بولمىسۇن؟

  ئىككىنچى بىر تەبىقىنىڭ چۈشىنىدىغان ئۈلۈشى بولسا: بىر چوڭ ھاكىم، قول ئاستىدىكىلەرگە ئاتىلارچە بىر شەپقەت بىلەن قارايدۇ. ئەگەر ئۇ ھاكىم، زاھىرىي ۋە باتىنىي جەھەتتىن بىر مەنىۋى پادىشاھ بولغان بولسا؛ ئۇنىڭ مەرھەمىتى، ئاتىنىڭ شەپقىتىدىن يۈز ھەسسە ئۈستۈن بولىدىغانلىقى ئۈچۈن، قول ئاستىدىكىلەرنىڭ ھەربىرى ئۇنىڭ ھەقىقىي پەرزەنتىدەك، ئۇنىڭغا ئۆز ئاتىسىدەك قارايدۇ. ئاتا نەزىرى بولسا، ئەر نەزىرىگە ئالماشمىغانلىقتىن، ھەمدە قىز نەزىرىمۇ ئايال نەزىرىگە ئاسان ئۆزگەرمىگەنلىكتىن، خەلقنىڭ پىكرىدە، پەيغەمبەرنىڭ مۆئمىنلەرنىڭ قىزلىرىنى ئېلىشى شۇ سىرغا ئۇيغۇن كەلمىگەنلىكى ئۈچۈن، قۇرئان ئۇ گۇماننى يوقىتىش مەقسىتىدە دەيدۇ: «پەيغەمبەر ﷲنىڭ رەھمىتى نامىدىن سىلەرگە شەپقەت كۆرسىتىدۇ، ئاتىلارچە مۇئامىلە قىلىدۇ. ھەمدە پەيغەمبەرلىك جەھەتىدىن سىزلەر ئۇنىڭ ئەۋلادلىرىغا ئوخشاشسىلەر. بىراق، ئىنسانىي شەخسىيىتى جەھەتىدىن داداڭلار ئەمەستۇر، ئۇنداقتا سىلەردىن ئۆيلىنىشى قانداقمۇ مۇناسىپ بولمىسۇن؟ سىزلەرنى «ئوغلۇم» دېيىشى بىلەن، شەرىئەت ئەھكاملىرى نۇقتىئىنەزىرىدىن سىلەر ئۇنىڭ پەرزەنتى بولالمايسىلەر!…»

اَلْبَاقِى هُوَ الْبَاقِى

سەئىد نۇرسى