ئىستانبۇلدىكى ئاياللار ئىچىدىن نۇرلارغا ئاجايىپ بىر ئالاقىدارلىق كۆرسەتكەن

خانىملارنىڭ مەكتۇبىدۇر.)

بِاسْمِهِ سُبْحَانَهُ

بەكمۇ مۆھتەرەم، بەكمۇ مۇبارەك، بۈيۈك ئۇستازىمىز ھەزرەتلىرى!

  بىز ئاجىز بىچارىلەرنى تالىپلىققا قوبۇل قىلغانلىقىڭىز ئۈچۈن بەكمۇ سۆيۈندۇق. گويا دۇنيالار بىزنىڭ بولدى. كۆزلىرىمىز سۆيۈنچ ياشلىرى بىلەن تولدى. يىغلىدۇق… ۋە يىغلاپ، ئۇلۇغ رەببىمىزگە چەكسىز شۈكۈرلەر ئېيتتۇق. جانابى ھەق بىز پېقىرلەرنى، ئوخشىشى بولمىغان بىر يۈز ئوتتۇز پارچە ئەسەرلىرى ھەر تەرەپتە ئىشتىياق بىلەن ئوقۇلغان سىزدەك دۇنيادا بىر بەدىئۇززامان بولغان بۈيۈك بىر ئۇستازنىڭ دۇئالىرىغا داخىل قىلدى. بۇ زاماننىڭ ئەڭ بۈيۈك كىشىسى بولغان رىسالەئى نۇرنىڭ ساھىبىنىڭ تالىپى بولۇشتەك بەكمۇ بۈيۈك بىر شەرەپكە، بەكمۇ بۈيۈق بىر نىئمەتكە ئېرىشتۈردى…

  ئاھ ئۇستازىمىز، نېمە ئامال! ھەدىيە ئەۋەتەيلى دېسەك، ھەدىيە قوبۇل قىلمايسىز. سىز بىزنىڭ ئەبەدىي ھاياتىمىزنى قۇتقازدىڭىز. بىز سىزگە كىچىككىنە ياخشىلىقمۇ قىلالمايۋاتىمىز. دۇنيا تولغۇدەك ياخشىلىق قىلىنغان تەقدىردىمۇ، يەنىلا سىزنىڭ بىزنى كامىل ئىمانغا ئېرىشتۈرگەن رىسالەئى نۇردەك بۈيۈك بىر ئىلتىپاتىڭىزغا تەڭ كېلەلمەيدۇ. جانابى ھەق سىز ئۇستازىمىزدىن ئەبەدىي رازى بولسۇن، سالامەتلىك ۋە شىپا بەرسۇن. ھەمدە بىزلەرنى ئۇستازىمىز بەدىئۇززاماندىن ئايرىمىسۇن، ئامىن…

  ئەي رەببىمىز! سۆيۈملۈك پەيغەمبەرىمىز بولغان ھەبىبىڭنىڭ ھۆرمىتى ئۈچۈن، بۇ دۇئايىمىزنى قوبۇل قىلغىن. ئامىن!

  بۈيۈك ئۇستازىمىز! ئۆزىمىزنى سىزگە تالىپ بولۇشقا لايىق كۆرمەيۋاتىمىز. سىزنىڭ بىزلەرگە ناھايىتىمۇ مېھرىبانلىقىڭىز، بەكمۇ زىيادە تۆھپىكارلىقىڭىز بىزلەرنى دۇنيا–ئاخىرەتتە سائادەتلەرگە ئېرىشتۈرىدىغان رىسالەئى نۇر تالىپلىقىغا داخىل قىلدى. رىسالەئى نۇرنى ئوقۇۋاتىمىز. ئاخىرەتلىك ھەمشىرىلىرىڭىز رىسالەئى نۇرغا تولىمۇ مۇشتاقتۇر. بىرلىكتە ئوقۇۋاتىمىز. نۇر رىسالىلىرىدىن كۆپلەپ–كۆپلەپ فەيزلەر ئېلىۋاتىمىز. بىزلەر ھازىرغا قەدەر رىسالەئى نۇردا ئاياللارغا بېرىلگەن تولىمۇ مۇقەددەس دەرسلەرنى، ھېچبىر كىتاپتا كۆرمىدۇق، ھېچبىر موللىدىن ئاڭلىمىدۇق. ئۇ بەكمۇ قىممەتلىك، بەكمۇ گۈزەل، بەكمۇ تاتلىق ئىمان ھەقىقەتلىرى بىزنىڭ روھىمىزنىڭ ئوزۇقىدۇر.

  رىسالەئى نۇردىكى مۇقەددەس قۇرئان ھەقىقەتلىرى بىزنىڭ قەلبىمىزگە تەسىر قىلىپ، قەلبىمىزدە نۇردىن مۇھەببەت ئاتەشلىرىنى ياندۇرماقتا، ئىمانىمىزغا قۇۋۋەت بەرمەكتە، مەنىۋىياتتا دەرىجىلىرىمىزنى يۈكسەلتمەكتە. رىسالەئى نۇر بىزنى پىتنىلەردىن ئۇزاقلاشتۇرماقتا، توپتوغرا يولغا، قۇرئان يولىغا باغلىماقتا. بىزنى شەيتانلارنىڭ، جىنلارنىڭ، ھەمدە بىزنى دىن پەردىسى ئارقىسىدا ئالدىغۇچى، ئازدۇرغۇچى كىشىلەرنىڭ شەررىدىن ئەمىن قىلماقتا. ئۇلۇغ رەببىمىز سىز ئۇستازىمىزدىن ئەبەدىي رازى بولسۇن، ئۇزۇن ئۆمۈر بەرسۇن… سىز ئۇستازىمىزغا بولغان تەشەككۈرلىرىمىز چەكسىزدۇر.

  سەييىدىمىز سۆيۈملۈك پەيغەمبىرىمىز رەسۇلى ئەكرەم ئەلەيھىسسالاتۇ ۋەسسالام، سىز ئۇستازىمىزغا ۋە نۇر تالىپلىرى بولغان قېرىنداشلىرىمىزغا ئىمان ۋە قۇرئان خىزمىتىدە دائىما مەدەتكار ۋە ياردەمچى بولسۇن. جانابى ھەق سىزلەرنى بۇ قۇرئان خىزمىتىدە مۇۋەپپەق قىلسۇن. ئامىن، ئامىن، ئامىن…

ئۇستازىمىز ھەزرەتلىرى!

  نېمىدىگەن چىدىغۇسىز ئەھۋال! بۇزغۇنچى تەشكىلاتلار، دىن دۈشمەنلىرى، ھىيلە–مىكىرلەر بىلەن بىز ئاياللارنى ئازدۇردى، كۆپلىرىمىزنى ئىسلامىيەتتىن ئۇزاقلاشتۇردى. بىزنى يۈكسەك ئىسلام تەربىيىسىدىن، ئالىي ئىسلام ئەدەپلىرىدىن مەھرۇم قىلدى. ھېلىھەم دىنىمىزغا زەرەرلىك نەرسىلەرنى بىزگە سىڭدۈرۈشكە ئۇرۇنماقتا. رەببىمىزگە ھېسابسىز ھەمدۇ–سانالار بولسۇنكى، رىسالەئى نۇر بىزنى بۇلارغا كىرىپ قېلىشتىنمۇ قۇتقۇزدى. رىسالەئى نۇرغا نائىل بولغاندىن بېرى، قەلبلىرىمىزگە نۇرلار ياغدى. روھىمىزدا نۇرلۇق ئالەملەرگە قارىغان پەنجىرىلەر ئېچىلدى. نۇر رىسالىلىرىنى ئوقۇغانسېرى، ئىمانىمىزغا، مۇقەددەس دىنىمىزغا ئالاقىمىز كۈچەيدى. شەرەپلىك سەييىدىمىز بولغان ھەبىبۇللاھقا (ئە.س.ۋ) مۇھەببىتىمىز ئارتتى. ﷲقا بولغان ئىتائىتىمىز، مۇھەببىتىمىز، ئىشقىمىز بىناھايەت ھالغا كەلدى. نۇرلارنى ئوقۇغانسېرى، دىنىمىزغا، ئىمانىمىزغا زىيان بەرگەن نەرسىلەرنى پەرق ئېتىشكە باشلىدۇق.

  دىنىي دەرس بېرىۋاتىمەن دەپ، بىز ساپدىل ئاياللارنى ئازدۇرۇپ، خاتا يوللارغا تەشۋىق قىلغان كىشىلەرگە ئەگەشمەس بولدۇق. چۈنكى رىسالەئى نۇر بىزنىڭ كۆزىمىزنى ئاچتى. رىسالەئى نۇرنى ئوقۇشتىن ئاۋۋال بۇلارنى بىلمەيتتۇق. باشقا نەرسىلەرگە، باشقا ھەۋەسلەرگە ئەگىشىپ گۇناھلاردا يۈرۈپتىكەنمىز. پاك ئىسلام ئاياللىرىنىڭ شەرىپىگە ياراشمىغان، ياۋروپالىق كافىرلارنىڭ ھالەتلىرىنى تەقلىد قىلىشقا بېرىلىپتىكەنمىز. رىسالەئى نۇر بىزنى جاھالەتتىن، شۇ چىركىن نەرسىلەردىن قۇتقۇزدى. گۇناھلاردىن ئۇزاقلاشتۇردى، ساۋاپلىق ئىشلارغا ئېرىشتۈردى. رىسالەئى نۇر بىزنىڭ ھەر دەردىمىزگە دەرمان، يارىلىرىمىزغا نۇرلۇق بىر مەلھەم بولدى. ھازىر ئىشىنىمىزكى، رىسالەئى نۇر ھەر نەرسىگە داۋادۇر. بۇ بەكمۇ نۇرانىي، بەكمۇ ھۇزۇرلۇق ئەسەرلەر بىزگە كۇپايىدۇر. ئۇ، باشقا نەرسىلەرنى ئىزدەشكە ئېھتىياج قويمىدى.

  بىز ئاياللار، ئەلھەمدۇلىللاھ دىنىمىزغا باغلانغانمىز. ئەمما، بىزگە ھەقىقىي بىر سۈرەتتە دىنىمىزنى ئۆگىتىدىغان، بىزنى ئىبادەتكە، گۈزەل ئەمەللەرگە، گۈزەل ئەخلاققا يېتەكلەيدىغان ئەسەرلەردىن مەھرۇم قىلىنغانىدۇق. دىنسىزلار ئاياللارنى يولدىن ئاداشتۇرغانىدى. شۇنىڭ ئۈچۈن بىزگە قۇرئان يولىنى ئۆگىتىدىغان، ئىسلامىيەتنىڭ نۇرلۇق، سالامەت يولىدا ئىمان ئىلمىنى تەھسىل قىلدۇرىدىغان نۇر رىسالىلىرىدەك بىر مۇرشىدى كامىل لازىم ئىدى. بۇنىڭغا تولىمۇ مۇھتاج ئىدۇق. بىزنى ئەبەدىي سائادەتلەرگە نائىل قىلىدىغان، بىزنى قۇرئان نۇرلىرى بىلەن نۇرلاندۇرىدىغان، قۇرئانى كەرىمنىڭ بىناھايەت ھۇزۇرلىرى بىلەن ھۇزۇرلاندۇرىدىغان نۇر رىسالىلىرىدەك بىر ئۇستازغا، بىر ئەسەرگە ئېھتىياجىمىز زور ئىدى. دېمەك بۇ نۇرلارنى، بۇ ئەسەرلەرنى، بۇ ئۇستازنى كۆرمەپتىكەنمىز. دېمەك غەپلەتتە ئىدۇق. كۆردۇق، ئۆزىمىزگە كەلدۇق، ئويغاندۇق، رىسالەئى نۇرغا يېپىشتۇق. باشقىلارنىڭ ئالداشلىرىدىن قۇتۇلدۇق. نۇر رىسالىلىرىدىكى قۇرئان، ئىمان نۇرلىرىغا ئېرىشتۇق، ئەلھەمدۇلىللاھ. ﷲنىڭ بۇ بۈيۈك ئىلتىپات ۋە كەرەمىگە چەكسىز شۈكۈرلەر ئېيتىمىز…

  ئۇستازىمىز! بىز نۇر رىسالىلىرىگە روھى–جېنىمىز　بىلەن ئېسىلدۇق. «خانىم–قىزلار رەھبىرى»، «ياشلار رەھبىرى»، «كىچىك سۆزلەر»، «بىمارلار رىسالىسى»، «ياشانغانلار رىسالىسى» بىزنىڭ تولىمۇ ئۈستۈن رەھبىرىمىزدۇر. بىزنىڭ يارىلىرىمىزنى ساقايتقان نۇرانىي دەرسلىرىمىزدۇر. «خانىم–قىزلار رەھبىرى» تەكرار–تەكرار ئوقۇلۇشقا لايىق بىر ئەسىرىڭىزدۇر. ئوقۇغانسېرى ئوقۇغىمىز كېلىدۇ. «ياشلار رەھبىرى»نى تەكرار–تەكرار ئوقۇۋاتىمىز. تەكرار ئوقۇغانسېرى چۈشىنىشىمىز ئېشىۋاتىدۇ. روھ ۋە قەلبىمىزدە تەسىرى زىيادىلىشىۋاتىدۇ.

  «سۆزلەر»نى، «بىمارلار رىسالىسى»نى، «ياشانغانلار رىسالىسى»نى پات–پات ئوقۇپ تۇرىۋاتىمىز. بۇ رىسالىلەرگە بىزلەر ناندىن، سۇدىن، ھاۋادىنمۇ بەك مۇھتاج ئىكەنلىكىمىزنى ئوقۇغانسېرى ئىدراك قىلىۋاتىمىز، چۈشىنىۋاتىمىز. مۇشۇ تەرزدە نۇر رىسالىلىرىنى قايتىلاپ ئوقۇپ تۈگىتىۋاتىمىز. نۇر رىسالىلىرى بىزنىڭ روھىمىزدۇر، قەلبىمىزدۇر، بېشىمىزنىڭ تاجىدۇر، كۆڭلىمىزنىڭ نۇرىدۇر. نۇرلارنى باغرىمىزغا باستۇق. ئۇلارنى يېنىمىزدىن، تىلىمىزدىن، سومكىمىزدىن ئايرىمايۋاتىمىز.

  ئۇستازىمىز! نۇر رىسالىلىرىدىكى ئىمان نۇرلىرى، بىردىن گۈلى مۇھەممەدىيگە ئوخشايدۇ (ئەلەيھىسسالاتۇ ۋەسسالام). بىز بۇ ئەسەرلىرىڭىزنىڭ بىزگە نەقەدەر پايدىلىق ئىكەنلىكىنى، روھىمىزغا، قەلبىمىزگە قانچىلىك دەرىجىدە تەسىر قىلغانلىقىنى تىل بىلەن ئىپادىلەشكە ئاجىزمىز.

  ئۇستازىمىز! نۇر تالىپلىرى ئوقۇيدىغان، مىسلى ۋە ئوخشىشى تېخى دۇنيادا بولمىغان «جەۋشەنۇل كەبىر» ئىسملىك، سەييىدىمىز مۇھەممەد ئەلەيھىسسالاتۇ ۋەسسالام ھەزرەتلىرىنىڭ دۇئاسىغا ۋە ئىنتايىن ساۋاپلىق، ئىنتايىن نۇرلۇق، ئىنتايىن پەزىلەتلىك بولغان دۇرۇتى شەرىفلىرىڭىزگە ئىگە بولدۇق، ئوقۇشقا باشلىدۇق. سىز داۋاملىق ئوقۇغان بۇ تولىمۇ قىممەتلىك، تولىمۇ مۇبارەك دۇئالار بىزنىڭ زىكرىمىز، بىزنىڭ دۇئايىمىز بولدى، ئەلھەمدۇلىللاھ! ئەمما رىسالىلەرنى ئوقۇشقا ئەڭ كۆپ غەيرەت كۆرسىتىۋاتىمىز، ئۇنىڭغا ئەھمىيەت بېرىۋاتىمىز. چۈنكى نۇر رىسالىلىرىنى قانچىلىك پات–پات ئوقۇپ تۇرساق، بۇ دۇئالاردىن تېخىمۇ بەك ھۇزۇر ئېلىۋاتىمىز. دۇئالارنى، زىكىرلەرنى مۇبارەك كېچىلەردە، بولۇپمۇ رەغائىب كېچىسى، مىراج كېچىسى، بارات كېچىسى، قەدر كېچىسى ۋە جۈمە كېچىلىرىدە ئوقۇۋاتىمىز.

  جانابى ﷲ، شەپقەتكە ئىنتايىن مۇھتاج بولغان بىز ئاياللارغا، سىزدەك تولىمۇ شەپقەتلىك، تولىمۇ مەرھەمەتلىك بىر زاتنى ئۇستاز قىلدى. زېمىن يۈزىدە ئەڭ توغرا ۋە ئەڭ يۈكسەك، ئەڭ ھەقىقىي بىر مۇرشىد بولغان نۇر رىسالىلىرىنى بىزلەرگە ئېھسان قىلدى.

  ۋاپات بولغاندىن كېيىن بىز مۇرشىدسىز قالىدىغان فانىي بىر ئۇستازغا يېپىشمايۋاتىمىز. ئۆلمەيدىغان، باقىي بولغان قۇرئاننىڭ تەپسىرى بولغان رىسالەئى نۇردەك ئەبەدىي بىر ئۇستازىمىز بار. ئۇستازىمىز بىزگە ئەبەدىي ئۇستازلىق قىلىدۇ، بىزگە ھامىي بولىدۇ، بىزنى تا ئۆلگۈچە نۇرلاندۇرىدۇ ئىنشائاللاھ.

  ئاللاھىمىزغا كۆپ شۈكۈرلەر بولسۇن، بىز ئەمدى بىر ئالىي مەكتەپ بولغان نۇر مەكتىپىگە كىردۇق. قۇرئان نۇرلىرىغا باغلاندۇق. رىسالەئى نۇر بىزنىڭ يۈكسەك دەرسلىكىمىزدۇر. رىسالەئى نۇر بەكمۇ بۈيۈك نۇر مەنبەسى، بەكمۇ مول ھۇزۇر خەزىنىسىدۇر. بىز ئاياللار نۇر تالىپى بولغىنىمىزدىن ئىپتىخارلىنىمىز، شەرەپ ھېس قىلىمىز. بۇ ئالدامچى زاماندا، ھالاكەتلەر ئىنسانىيەتنى بوغقان بۇ ئەسىردە، قوغدىغۇچى ئەڭ بۈيۈك قەلئە، رىسالەئى نۇرغا تالىپ بولۇشتۇر. رىسالەئى نۇر تالىپلىقى، ئەڭ بۈيۈك بىر شەرەپتۇر. قۇرئان ھەقىقەتلىرىنى قەلبىمىزگە، روھىمىزغا، ئەقلىمىزگە سىڭدۈرگەن نۇر رىسالىلىرىگە باغلىنىش قۇرئانغا، ئىسلامىيەتكە باغلىنىشتۇر.

  بولۇپمۇ ئاياللارنىڭ ساددىلىقىدىن پايدىلىنىپ ئۇلارنى ئالداۋاتقان كىشىلەر كۆپ بولغان بۇ قالايمىقان دەۋردە، ئەڭ توغرا يول، ئەڭ توغرا رەھبەر، ئەڭ ھەقىقىي ئۇستاز رىسالەئى نۇردۇر. رىسالەئى نۇر، قۇرئان يولىدۇر. رىسالەئى نۇر، ئىمان ۋە ئىسلامىيەت يولىدۇر. ئەڭ گۈزەل، ئەڭ شېرىن، ئەڭ ھۇزۇرلۇق نۇرانىي ھەقىقەتلەر رىسالەئى نۇردىدۇر. ئىنسان كەلىمەئى تەۋھىدنى زىكىر قىلغاندا، قۇرئان ئوقۇغاندا قانچىلىك ئىلاھىي بىر ئىشققا تولغان بولسا؛ رىسالەئى نۇرنى ئوقۇغاندا ۋە ئاڭلىغاندىمۇ شۇنداق بولىدۇ. چۈنكى رىسالەئى نۇر باشتىن ئاياغ كەلىمەئى تەۋھىدنىڭ ھەقىقەتلىرىنى دەرس بەرمەكتە. قۇرئان ھەقىقەتلىرىنى، تەۋھىد ھەقىقەتلىرىنى بىزگە چۈشەندۈرۈپ، قەلبىمىزگە، ئەقلىمىزگە، روھىمىزغا نەقىش قىلىپ ئويماقتا. ھەممىسىنى لايىقىدا چۈشىنەلمىسەكمۇ، چۈشىنەلىگىنىمىز بىزنى قۇتقازماقتا. بىز چۈشىنەلمىگەن يۈكسەك ھەقىقەتلەرمۇ، مەنىۋى جەھەتتىن بىزگە تەسىر قىلماقتا، ھۇزۇرلاندۇرماقتا، نۇرلاندۇرماقتا. شۇنداق بولغاچقا، نۇر رىسالىلىرى قېتىم–قېتىملاپ ئوقۇلماقتا، تەكرار–تەكرار مۇتالىئە قىلىنماقتا.

ئۇستازىمىز ھەزرەتلىرى!

  سىز ئالدىمايدىغان، ئۆزى سۆزى بىلەن بىردەك بولغان، ئىلمىگە ئەمەل قىلغان ھەقىقىي بىر ئۇستازسىز.　ئەڭ مۇستەقىم،　ھەقىقىي بىر مۇرشىدى كامىلسىز. ناۋادا سىزگە بېرىلگەن ھەدىيەلەرنى ھازىرغا قەدەر رەت قىلمىغان بولسىڭىز،　ئالتۇندىن ساراي قۇرغىلى بولاتتى. سىز نۇر رىسالىلىرى بىلەن ھەقىقىي بىر ئۇستاز، ھەقىقىي ئەڭ بۈيۈك مۇرشىدسىزكى، ئۆزىڭىز ئۈچۈن دۇنيا پايدىلىرىنى توپلىمىدىڭىز،　دۇنيا بايلىقلىرىنى جەملىمىدىڭىز… دۇنيانى تەرك قىلدىڭىز. پەقەت ﷲ رازىلىقى ئۈچۈن ئىمان دەرسلىرىنى بەردىڭىز، قۇرئانغا خىزمەت قىلدىڭىز. دېمەك، سىزدىكى بۇ ئىخلاس ئۈچۈندۇركى، بىز ئاياللار ۋە مىليونلارچە ئەرلەر، ياشانغانلار ۋە ياشلار، كىتابلىرىڭىزغا ئېسىلماقتا… دەرسلىرىڭىزنى ئىشەنچ بىلەن داۋام قىلماقتا. دىن ئۈچۈن، ئىمان ئۈچۈن پىدائىي بولماقتا. رىسالەئى نۇر يولىدا پۈتۈن مۈشكۈلاتلارغا كۆكرەك كېرىمەكتە. سىزنىڭ سۆزلىرىڭىزگە تولىمۇ ئەھمىيەت بەرمەكتە، ئىشەنمەكتە…

  سىز قۇرئانى كەرىمدىكى ئاياللارنىڭ قىممىتىنى، ئىپپەت ۋە نۇمۇسىنى قوغدىغان، ھەمدە ئۇلارنى پەسكەش نەزەرلەردىن ساقلىغان ئايەتنى تەپسىر قىلغانلىقىڭىز ئۈچۈن، دىنسىزلار سىزنى يوقۇتۇش ئۈچۈن سوت مەھكىمىلىرىگە تاپشۇردى، زىندانلارغا تاشلىدى. ئۇ مەھكمىلەردە سىزگە بېرىلىدىغان ئۆلۈم جازاسىدىن ئەسلا قورقمىدىڭىز. چىدىغۇسىز ئىسكەنجىلەرگە بەرداشلىق بەردىڭىز، قورقمىدىڭىز. يەنە شۇ ئايەتى كەرىمىنىڭ تەپسىرى بولغان ۋە ئاياللارنىڭ ھوقۇقىنى قوغدايدىغان رىسالىڭىزنى چىدامچانلىق بىلەن مۇداپىئە قىلدىڭىز. بۇ ئەسىردە ئەسكىلىكلەر ئىچىدە قالغان ۋە دىنىي، ھەقىقىي بىر قوغدىغۇچىغا بەكمۇ مۇھتاج بولغان ئاياللارنى گۇناھلاردىن ساقلايدىغان، يۈكسەلتىدىغان رىسالىڭىزنى ئاخىرى نەشىر قىلدىڭىز، بىزلەرگە ياردەمگە يېتىشتۈردىڭىز. بىزگە ئەرلىرىمىز دەۋاتىدۇكى: «بۇ ئوتتۇز–قىرىق يىل ئىچىدە، ئاياللارنى مۇداپىئە قىلىدىغان ئىسلامىي بىر ئەسەرنى يېزىشقا ھېچ كىشى جاسارەت قىلالمىدى. بۇنداق بىر ئەسەرنى، دىنسىزلارنىڭ ئىسكەنجىلىرى ئاستىدا، پەقەت بەدىئۇززامانلا يازالىدى. ئاياللار ئالىمىگە بۈيۈك بىر رەھبەر بولدى…»

  ئۇستازىمىز! سىز، دىنسىزلار كۆپ بولغان مۇشۇنداق بىر زاماندا، سىزنى يوقىتىش ئۈچۈن ئېلىپ بارغان مەھكىمىلەردە قۇرئاننى ۋە ئىسلامىيەتنى مۇداپىئە قىلدىڭىز.

  كامىل مۇرشىدنىڭ قانداق بىر زات بولىدىغانلىقىنى، ئابدۇلقادىر گەيلانىي (ر.ئە)، شاھى نەقشىبەند (ر.ئە)، ئىمامى رەببانىي (ر.ئە) ھەزرەتلىرى كەبى بۈيۈك زاتلارنىڭ كىتابلىرىدىن بىلگەن قېرىنداشلىرىمىز بار. بىزلەر، ئەڭ بۈيۈك بىر ئۇستازنىڭ، ئەڭ بۈيۈك بىر مۇرشىدى كامىلنىڭ شەرتلىرىنى، ھاللىرىنى، سۈپەتلىرىنى سىزدىن تامامەن تاپماقتىمىز، ئەسەرلىرىڭىزدە ئوقۇماقتىمىز. مۇرشىدى كامىل، پەقەت بىز يۇقىرىدا بىر–ئىككى سۈپىتىنى بايان قىلغان شەكىلدە بولغان بىر زاتتۇر. بىز، پەقەت ئەنە شۇنداق بولغان سىزدەك بىر ئۇستازغا ۋە ئەسەرلىرىڭىزگە باغلانماقتىمىز. بالىلىقىڭىزدىن بېرى ئىستىقامەت بىلەن ئۆتكەن سىزنىڭ ھاللىرىڭىزنى كۆپلەر ئەينەن كۆرگىنىگە ئوخشاش، سوت مەھكىمىلىرىدىمۇ سىزنىڭ ھالىڭىز ئايان بولدى. بۇلار سىزنىڭ بۇ زاماندا ئوخشىشى بولمىغان، ئەسەر ساھىبى بولغان ئەڭ بۈيۈك بىر زات ئىكەنلىكىڭىزگە دەلىلدۇر.

  سىزنىڭ رىسالەئى نۇر ئەسەرلىرىڭىزگە چىن كۆڭۈلدىن ئىشەنچ باغلىدۇق. قۇرئان نۇرىنى سۆيگۈ بىلەن، مۇھەببەت بىلەن ئوقۇۋاتىمىز. سىز پۈتۈن ئۆمرىڭىزدىكى ھاللىرىڭىز بىلەن، شان–شەرەپلىك سەييىدىمىز پەيغەمبىرىمىز ھەزرەتلىرىنىڭ ماڭغان قۇرئان يولىدىن كېتىۋاتىسىز. دىنىي ئەسەرلەر چەكلەنگەن ئېچىنىشلىق كۈنلەردە، ئىماننى قۇتقۇزىدىغان نۇر رىسالىلىرىدەك ئەسەرلەرنى روياپقا چىقاردىڭىز.

  سەييىدىمىز ھەزرىتى پەيغەمبەر ئەلەيھىسسالاتۇ ۋەسسالامنىڭ يولىغا دەل ئەگەشكەنلىكىڭىزدىن، قەتلى قىلىنىشتىن، سوتلاردىن، زۇلۇملاردىن قورقمىدىڭىز. ھەمدە ﷲنىڭ ئىنايىتى بىلەن، بىر يۈز ئوتتۇز پارچە نۇر رىسالىلىرىنى مەيدانغا كەلتۈردىڭىز. تىك تۇرغان ئارسلانلار كەبى، ئىسلام دىنىنى جازا مەھكىمىلىرىدە مۇداپىئە قىلدىڭىز.

ئەزىز ئۇستازىمىز!

  يىگىرمە يىلدىن بېرى رىسالەئى نۇرغا خىزمەت قىلغان قىممەتلىك تالىپىڭىز، مۆھتىرەم ئانىمىز ئاسىيە خانىم بۇ يەردە. بىزلەرگە رىسالەئى نۇرنى تونۇتتى. ئاياللار ئارىسىدا ئىمان ئۈچۈن، رىسالەئى نۇر ئارقىلىق بۈيۈك خىزمەتلەرنى قىلدى. ئەنقەرەدىكى ئانىمىز رىسالەئى نۇرغا ئىخلاس بىلەن خىزمەت قىلماقتا. كۆپلىگەن خانىملارنىڭ رىسالەئى نۇر بىلەن بەخت–سائادەت تېپىشىغا، ئىمانلىرىنىڭ قۇتۇلۇشىغا سەۋەب بولماقتا. ئافيون شەھرى تەرەپتىكى شاھادەتلىك، نۇرلۇق، پائال رىسالەئى نۇر ئوقۇغۇچى قېرىندىشىمىز رىسالەئى نۇرنىڭ مەسلىكىگە ئۇيغۇن ھالدا خىزمەت قىلىۋېتىپتۇ. نۇرغۇن ئاياللار، ياش قىزلار ئۇنىڭ ۋاستىسى بىلەن رىسالەئى نۇردىن ئىمان دەرسى ئوقۇش سائادىتىگە ئېرىشىۋېتىپتۇ. ئانتاليادىمۇ نۇرغۇن رىسالەئى نۇر ئوقۇغۇچى قېرىنداشلىرىمىزنىڭ رىسالەئى نۇر ئۈچۈن تىرىشىۋاتقانلىقىنى، رىسالەئى نۇرنى يازغانلىقلىرىنى ئاڭلىدۇق. تولىمۇ خۇرسەن بولدۇق… ھەمدە نۇرلار ئۈچۈن تىرىشقان بۇ نۇرلارنى ئوقۇغۇچى قېرىنداشلىرىمىزغا ۋە ۋەتىنىمىزدىكى بارلىق ئاخىرەتلىك قېرىنداشلىرىمىزغا دۇئا قىلىمىز، ئۇلارنى چىن كۆڭلىمىزدىن تەبرىكلەيمىز.

  ئۇزۇن يازدۇق، سىزدىن كەچۈرۈم سورايمىز. نۇرغا بولغان مۇھەببەت، نۇرغا بولغان سۆيگۈ بىزنى تۇرغۇزمايۋاتىدۇ. دائىما نۇردىن سۆزلىشىمىز. ھەر زامان تىلىمىزدا، قەلبىمىزدە، روھىمىزدا نۇر سۆيگۈسى!… نۇر ئوقۇيمىز… نۇر يەتكۈزىمىز… نۇر يايىمىز ئىنشائاللاھ…

  ئەنقەرەدە رىسالەئى نۇر مەتبۇئاتلاردا مىڭلاپ بېسىلىۋېتىپتۇ. بۇ ئەڭ چوڭ بايرىمىمىزدۇر. بۇ بايرام، پۈتۈن دۇنيادىكى دىن قېرىنداشلىرىمىزنىڭ بايرىمىدۇر. بۇنىڭ ئۈچۈن ئاۋۋال سىز ئۇستازىمىزنى ۋە پۈتۈن رىسالەئى نۇر تالىپلىرىنى تەبرىكلەيمىز. بۇ يەردىكى رىسالەئى نۇر بىلەن ئالاقىدار ئاخىرەتلىك ھەمشىرىلىرىمىز ۋە بىزلەر سىزگە بەك كۆپ سالام ۋە دۇئالارنى قىلىۋاتىمىز. ئەڭ يۈكسەك ھۆرمەت بىلەن قوللىرىڭىزنى سۆيىمىز.

ئۇستازىمىز ھەزرەتلىرى!

  بىز بۇ دەھشەتلىك زاماندا، رىسالەئى نۇردىن ئالغان دەرسلىرىمىز بىلەن ئىماننى قازىنىشتەك چەكسىز بىر سائادەتكە نائىل بولغانلىقىمىز ئۈچۈن، قەلبىمىزدە تۇغۇلغان شۈكرانىلىرىمىزنى مانا بۇ سۈرەتتە يازدۇق. ئەگەر قولىمىزدىن كەلسە، رىسالەئى نۇرنىڭ ئاياللارغا ۋە پۈتۈن ئىسلام مىللەتلىرىگە بەرگەن پايدىلىرىنى، مىڭلارچە سەھىپىلەر تولغۇدەك قىلىپ قەلەمگە ئالاتتۇق. ئەمما مۇمكىن بولمايدۇ.

  شۇنداق بىر زامان كېلىدۇكى، مىليونلاچە ئاياللار نۇر رىسالىلىرىنىڭ دائىرىسىگە، رىسالەئى نۇر دەرسلىرىگە پەرۋانىلەردەك ئېتىلىدۇ. رىسالەئى نۇردىن مۇقەددەس ئىمان دەرسلىرىنى ئالىدۇ، ئاڭلايدۇ. نۇر ئاسمىنىدا نۇرلار پارلايدۇ. فىردەۋس جەننىتىنى قازاندۇرىدىغان ئىمان نىئمىتىگە نائىل بولىدۇ.

بەكمۇ شەپقەتلىك، بەكمۇ مەرھەمەتلىك ئۇستازىمىز!

  رىسالەئى نۇرنىڭ بۇ بۈيۈك بايرىمىنى تەكرار تەبرىكلەيمىز… بىز، سىز شەپقەتلىك ئۇستازىمىزدىن، رىسالەئى نۇردىن تا ئۆلگەنگە قەدەر ئايرىلمايمىز. سىز ۋە رىسالەئى نۇر دۇنيادا مۇرشىدىمىز، ئاخىرەتتە شاپائەتچىمىزسىلەر. جېنىمىز قۇرئان ۋە ئىمان نۇرى بولغان رىسالەئى نۇر ئۈچۈن ۋە قۇرئان ئېلانچىسى بولغان سىز ئۇستازىمىز ئۈچۈن قۇربان بولسۇن. ھەر نەرسىمىز رىسالەئى نۇرغا پىدا بولسۇن…

اَلْبَاقِى هُوَ الْبَاقِى

ئىستانبۇلدىكى دۇئايىڭىزغا مۇھتاج

تالىبەلىرىڭىز ۋە مەنىۋىي ئەۋلاتلىرىڭىز:

خەيرۇننىسا، سەييىدە، ئەمىنە، فاتىمە

  ئەي قەلبىمىزدە ئىپادىلىگۈسىز چەكسىز مۇھەببەتلىرىمىز بولغان بەكمۇ مۆھتىرەم، بەكمۇ ئەزىز، بەكمۇ سۆيۈملۈك ئۇستازىمىز ھەزرەتلىرى!

  كىرىشكە مۇشەررەپ بولغان رامىزانى شەرىفىڭىزنى چىن قەلبىمىزدىن تەبرىكلەيمىز. قۇسۇرلىرىمىزنى ئەپۇ قىلىپ، بىز بىچارىلەرنى نۇر تالىپلىرى قاتارىدا قوبۇل قىلىشىڭىزنى ئۆتۈنىمىز.

  ئەي روھىمىزنىڭ ئوزۇقى ۋە قەلبىمىزنىڭ ئەبەدىي ئۆچمەس مەشئىلى، ماددىي ۋە مەنىۋىي دەرتلىرىمىزنىڭ دەرمانى! ئەي قۇرئانى مۆجىزۇلباياننىڭ بۈيۈك، پارلاق ۋە ساپ نۇرىدىن ئېتىلىپ چىققان، ھەمدە بارچە ئىنسانىيەت ئالىمىنى يورۇتۇش قۇۋۋىتىگە ساھىب بولغان يۈكسەك ئەسەرنىڭ تەرجىمانى بولغان ئۇستازىمىز!

  سەن ئىنسانلارنى ﷲ ۋە رەسۇلۇللاھ يولىغا يېتەكلەپ، ئىنسانىيەت ھەقىقىتىنى ئەقىل ۋە ئىدراك ساھىبى بولغان ھەربىر ياشقا ۋە ياشانغانغا، ئاۋامغا ۋە ئالىملارغا ھەقىقىي مەنىسى بىلەن چۈشەندۈرۈشكە تىرىشقان ۋە بۇنىڭدا مۇۋەپپەق بولغان بىر ئىمان خادىمىسەن.

  مانا بۇ جەھەتتىن، بۇ ئەسىردە قۇرئانى كەرىمنىڭ بىر مەنىۋىي مۆجىزىسى بولغان رىسالەئى نۇرغا پۈتۈن ۋۇجۇدىمىز ۋە بارلىقىمىز بىلەن ئېسىلىۋاتىمىز، ھۆرمەت، تەبرىك ۋە ئىھتىرام كۆرسىتىۋاتىمىز. بىزنىڭ رىسالەئى نۇرغا بولغان بۇ باغلىنىشىمىزنى ئۈزەلەيدىغان ھېچقانداق كۈچ يوق. ھەتتا بۇنى تەسەۋۋۇر قىلىشمۇ مۇمكىنسىزدۇر. چۈنكى ئۇ كۆڭۈللەر ئۈستىگە قۇرۇلغان ئىمانىي بىر باغلىنىشتۇر. بىز سىزنىڭ ۋە رىسالەئى نۇرنىڭ يولىدىن ئەسلا ئايرىلمايمىز. ھەمدە بۇ ئوخشىشى يوق نۇردىن داۋاملىق پايدىلىنىمىز، ئىنشائاللاھ… چۈنكى ئۇ، يەر يۈزىدە مىسلى كۆرۈلمىگەن، شۇنداقلا بۇندىن كېيىنمۇ كۆرۈلۈشى مۇمكىن بولمىغان قۇرئاننىڭ بىر ئىمان دەرسى ۋە بىر تەۋھىد خەزىنىسىدۇر. دېمەككى بىز، بىزگە مۇشۇنداق ئەسەرلەرنى ھەدىيە قىلغان سىزدەك مۇبارەك ۋە ئەزىز ئۇستازىمىزغا ئەبەدىي قەرزدار ۋە مىننەتدارمىز.

ئەي مۇبارەك ۋە تولىمۇ سۆيۈملۈك ئۇستازىمىز ھەزرەتلىرى!

  بىز ئۆزىمىز مەنسۇپ بولغان مۇقەددەس دىنىمىز ھەققىدە يېتەرلىك دەرىجىدە بىلىم ئېلىشىمىز، ھەمدە ئىستىقبالىمىزنى ۋە ئەبەدىي سائادىتىمىزنى تەمىن قىلالىشىمىز ئۈچۈن، دىنىي بىر ئەسەر، بولۇپمۇ بۇ ئەسىرنىڭ ئازغۇنلىشىپ كەتكەن ۋە ئالدىنى ئېلىش ئىنتايىن قىيىنلاشقان، كۇفۇرلۇق ۋە ئەخلاقسىز جەريانلىرىدىن قۇتقۇزىدىغان نۇرلۇق ۋە پارلاق بىر ئەسەر ئىزدەيتتۇق. ئاخىرى جانابى ھەقنىڭ ئىلتىپات ۋە ئىنايىتى بىلەن بىزگە ئېھسان قىلىنغان رىسالەئى نۇرنى تاپتۇق ۋە ئوقۇدۇق. ئۇنىڭدىكى مەنىۋى لەززەتنى ھېچبىر تەفسىردە مەۋجۇد بولمىغانلىقتىن، ئۇنىڭ بىر ھەيران قالارلىق ئەسەر ئىكەنلىكىنى ئىدراك قىلدۇق. چۈنكى رىسالەئى نۇر، قارايغان قەلبلەرنى نۇرى بىلەن يورۇتقان ۋە بىز بىچارىلەرنى زۇلمەتتىن نۇرغا، زالالەتتىن ھەقىقەتكە، دۇنيا ۋە ئاخىرەتتە سائادەت ۋە سالامەتكە ئېرىشتۈرىدىغان كامىل بىر مۇرشىد (رەھبەر) ۋە بۈيۈك بىر تەربىيەچىدۇر.

  بىز ئاجىزلارنى مۇشۇنداق ئەسەرلەرنى ئوقۇش شەرىپىگە نائىل قىلغان جانابى ھەقكە مىڭلارچە، يۇز مىڭلارچە مەرتە ھەمدۇ–سەنا ئېيتىمىز. پۈتۈن دۇنيا ئەسىرلەردىن بېرى كۈتكەن ۋە نۇرىدىن پايدىلىنىش ئۈچۈن جان بەرگەن، ئەمما مۇۋەپپەق بولالمىغان مۇشۇنداق بىر ئىلىم خەزىنىسىنى ئوقۇشنى بىزلەرگە نېسىپ قىلغان ئۇلۇغ خالىقىمىزغا شۈكرانە ئۈچۈن ئۆمرىمىزنىڭ ئاخىرىغا قەدەر بېشىمىزنى سەجدىدىن كۆتۈرمىسەك لايىقتۇر. تىلىكىمىز شۇكى، جانابى ھەق بىزلەرنى رىسالەئى نۇردىن ۋە سۆيۈملۈك ئۇستازىمىزدىن مەڭگۈ ئايرىمىسۇن. ئامىن، ئامىن، ئامىن…

ئەي قەدىرلىك ئۇستازىمىز!

  سىز قۇرئان ۋە ئىمان خىزمىتى ئۈچۈن ھەر نەرسىڭىزنى پىدا قىلدىڭىز. سىز دۇچ كەلگەن شۇ قەدەر شىددەتلىك زۇلۇم ۋە ئىسكەنجىلەرگە، ھەمدە سىز گىرىپتار بولغان شۇنچە كۆپ بالا–مۇسىبەتلەرگە، ناھايەت دەرىجىدە سەبىر ۋە چىدامچانلىق كۆرسەتتىڭىز. دىن ۋە ئىسلامىيەت دۈشمەنلىرىنىڭ شىددەتلىك تەرزدە بېسىملىرىغا قارىماي، ۋەزىپىڭىزدىن ئەسلا ۋاز كەچمىدىڭىز. سوت مەھكىمىلىرىدە قەلبىڭىزدە ھېچبىر قورقۇش ھېس قىلماستىن، ئىسلامىيەتنى پەرۋاسىزلارچە مۇداپىئە قىلدىڭىز. شۇنداق قىلىش بىلەن مانا مۇشۇنداق ئالىي، ئىككى دۇنيا سائادىتىگە كۇپايە ۋە يېتەرلىك بولغان ئەسەرلەرنى ۋۇجۇدقا كەلتۈردىڭىز ۋە بەكمۇ بۈيۈك بىر ئىمان داھىيسى بولدىڭىز. ھەمدە بۇ تەرزدە سىز، پۈتۈن ئىنسانىيەتكە ئاخىرقى بىر قېتىم، ھەق دىننى پۈتۈن ئۇلۇغلىقى ۋە مۇكەممەللىكى بىلەن، بارلىق قۇۋۋەت ۋە پارلاقلىقى بىلەن تونۇتۇش، يېيىش ۋە تەبلىغ قىلىشتەك مۇقەددەس ۋەزىپە بىلەن ۋەزىپىلەندۈرۈلگەنلىكىڭىزنى ئېلان قىلدىڭىز. بۇ جىھادىڭىزغا مۇبارەك بولسۇن!..

  بۇ مۇقەددەس ۋەزىپىنى ئورۇنداشتا، شەپقەتنىڭ چوققىسىغا چىقتىڭىز. بىر نەچچە بىچارىنىڭ جەننەتكە كىرىشى ئۈچۈن، جەھەننەمگە كىرىشكە ھازىر ئىكەنلىكىڭىزنى پۈتۈن قۇۋۋىتىڭىز بىلەن سۆزلەپ، دۇنيادا مىسلى كۆرۈلمىگەن ۋە ئېنگىزىسيونلارنىڭ*^ زۇلۇملىرىدىنمۇ قاتمۇ–قات ئېشىپ چۈشىدىغان دەرىجىدىكى ئەشەددىي زۇلۇم ۋە بالالارغا سەبىر ۋە غەيرەت كۆرسىتىپ بۇنى ئىسپاتلىدىڭىز.

  سىزنىڭ رىسالەئى نۇردىكى شۇ تەسىرچان سۆزلىرىڭىز روھىمىز، ئىرادىمىز ۋە ئەخلاقىمىزدا زور ئۆزگىرىشلەرنى ۋۇجۇدقا كەلتۈرمەكتە. بولۇپمۇ ئۇ رىسالىلەرنىڭ شاھى بولغان «سۆزلەر» مەجمۇئەسى تەكرار–تەكرار ئوقۇلۇشقا ۋە ئوقۇتۇشقا لايىقتۇر. ھەمدە بۇنداق بىر ئەسەرنىڭ، كۆپلىگەن مۇتەپەككۇر ۋە چوڭ ئۆلىمالارنىڭمۇ قولىدىن ياكى تىلىدىن چىقىشى مۇمكىن ئەمەسلىكىنى سۆزلەشنىڭ، ھەرگىزمۇ مۇبالىغە بولمايدىغانلىقىغا قانائەت ھاسىل قىلدۇق. رىسالەئى نۇر، ھەممىدىن ئاۋۋال ئىنسانلارغا بىر ئىبرەت دەرسىنى بېرىدۇ. ئاخىرەت پىكرىنى، ھېساب–كىتاب ھېسسىنى ئويغىتىدۇ. دۇنيادا تۇرۇپلا، ئەھلى سائادەت ۋە ئەھلى زالالەتنىڭ مەنزىللىرىنى ئېنىق كۆرسىتىدۇ.

  بىزلەرمۇ رىسالەئى نۇردىكى بۇ دەرسلەرنىڭ تەسىرى بىلەن، فانىي ھاياتنىڭ ئەندىشىلىرىنى ھېس قىلمىغۇدەك دەرىجىگە كېلىۋاتىمىز. ھەمدە ئۇنى ئوقۇش ئارقىلىق ﷲنىڭ رىزاسىغا ئېرىشىشىمىزگە، ھەزرىتى پەيغەمبەرنىڭ (ئە.س.ۋ) شاپائىتى ۋە ئۇنىڭ سۆيۈملۈك ۋەكىلى، شۇنداقلا ھەقىقىي تەرجىمانى بولغان سىز مۇبارەك ئۇستازىمىزنىڭ ياردىمى بىلەن سائادەتمەنلەردىن بولىشىمىزغا كۈچلۈك دەرىجىدە ئىشەنمەكتىمىز. ھەمدە ھاياتىمىزدا ئاخىرقى نەپەسلىرىمىزگە قەدەر، بۇ يولدا ھەر نەرسىمىزنى پىدا قىلىمىز. ھەمدە دۇچار بولغان ھەر پېشكەلنى ﷲنىڭ ئىزنى بىلەن، ئۇستازىمىزنىڭ ھىممىتى بىلەن يېڭىمىز. ھەمدە بىزنى بۇ يولدىن قايتۇرۇشنى خالىغان غاپىللارغا ئەسلا قۇلاق سالمايمىز، ئىنشائاللاھ.

ئەي سۆيۈملۈك ئۇستازىمىز ھەزرەتلىرى!

  بىز سىزنىڭ ۋە رىسالەئى نۇرنىڭ قىممىتىنىڭ بىر زەررىسىنى مەدھىيىلەشكىمۇ قادىر ئەمەسمىز. رىسالەئى نۇرنى ۋە سىزنى، قۇۋۋەتلىك تالىپلىرىڭىز جۇشقۇن سۆزلىرى بىلەن، ھارارەتلىك ئىشقلىرى بىلەن مەدھىيىلەپ كۈيلىمەكتىدۇر. بىز بولساق، ئۇلارنىڭ ئاياقلىرىنىڭ ئىزلىرىدىن سۆرىلىپ تاكى ھۇزۇرىڭىزغىچە چىقالىشىمىز ئۈچۈن، مۇشۇنداق ئاجىز تىلىمىز بىلەن بۇلارنى سىزگە يازدۇق. شۇ ھەقىقەت شېھىتلىرى بولغان ھافىز ئەلى ۋە ھەسەن فەيزىنىڭ (رەھمەتۇللاھى ئەلەيھىم) خاتىرىسى ئۈچۈن، بىزنىڭ بۇ جۈرئىتىمىزنى ياقتۇرىشىڭىزنى سىزدىن سورايمىز.

اَلْبَاقِى هُوَ الْبَاقِى

ئىزمىر، مانىسا ۋە ئەتراپىدىكى ئەۋلادلىرىڭىز ۋە قىيامەتلىك ھەمشىرىلىرىڭىز نامىدىن:

ئاسىمە، فاتىمە، لەمان، ئائىشە، نائىلە

(خانىم–قىزلار رەھبىرىگە ئىلاۋە قىلىنىدۇ.)

  (ئۇستازىمىزغا، رامىزانى شەرىفىنى مۇبارەكلەش مۇناسىۋىتى بىلەن يېزىلغان؛ ئىزمىر، مانىسا ۋە ئەتراپىدىكى رىسالەئى نۇرنىڭ ئالاھىدە تەسىرىنىڭ ۋە خىزمەتتىكى راۋاجىنىڭ نامايەندىسى، شۇنداقلا خانىم–قىزلار ئارىسىدىكى ياخشى تەسىرىنىڭ بىر مىسالى بولغان بۇ مەكتۇپ، ئەينەن ئىستانبۇلدىكى رىسالەئى نۇر ئوقۇغۇچى ئاياللارنىڭ يازغان مەكتۇبىغا ئوخشاش؛ ئىزمىر، مانىسا ۋە ئەتراپىدا –مەرھۇم ھافىز ئەلى، ھەسەن فەيزى ۋە خەلىل ئىبراھىم (رەھمەتۇللاھى ئەلەيھىم) كەبى– ئاياللار ئارىسىدىنمۇ خالىس نۇر قەھرىمانلىرى چىققانلىقىنى كۆرسىتىدۇ.)

————————————————-

كۆڭۈللەرنىڭ فاتىھى ھەزرىتى ئۇستازىمىز!

  قانداقمۇ سىزنى «ھەزرىتى ئۇستازىمىز» دەپ، رىسالەئى نۇرلارنى بولسا «نۇرلىرىمىز» دەپ پۈتۈن ۋۇجۇدىمىز بىلەن ئىشەنمەي تۇرالايمىز!؟ ئىشەنمەسلىكىمىز مۇمكىنمۇ؟ شۇنداق، ھەزرىتى ئۇستازىمىز، نۇرلۇق يولىڭىزنىڭ ھەزرىتى پەيغەمبىرىمىز، سەييىدىمىز رەسۇلى ئەكرەم ئەلەيھىسسالاتۇ ۋەسسالامغا تۇتىشىدىغانلىقىنى، نۇرلىرىمىزنى داۋاملىق تۈردە ئوقۇش ئارقىلىق چۈشىنىۋاتىمىز.

  رىسالەئى نۇرلارنىڭ، قۇرئانى كەرىيمىمىزنىڭ ھەق كىتاب ئىكەنلىكىنى كۆرسەتكەن، بىزلەر چۈشىنەلەيدىغان ۋە ئاڭقىرالايدىغان ھەقىقەتلەر قۇياشىدىن باشقا نەرسە ئەمەسلىكىگە پۈتۈن دۇنيا شاھىتتۇر. رىسالەئى نۇرلار ئابىھايات تامچىلىرىنى ۋە نۇرلىرىنى قارايغان روھلارغا ئېقىتىش بىلەن، بىز ياشاۋاتقان بۇ ئەسىردە ۋە كەلگۈسى دەۋرلەردىكى ئىنسانىيەتكە «ۋەزىپەڭنى قىل!» دەپ خىتاپ قىلغان ئىلاھىي بىر مۇئەللىمدۇر.

  قۇرئانىمىزدىن ۋە ئىمانىمىزدىن بەكمۇ يىراقلاشتۇرۇلغان ئىلگىرىكى دەۋرلەردە، بىزنى زالالەت ھاڭلىرىغا يۇمىلىتىپ، بىلمەستىن ئەبەدىي تۈرمە ۋە ھالاكەتلەرگە دۇچار قىلىشقا ئۇرۇنۇلغان ئۇ زۇلمەتلىك كۈنلىرىمىزدە، قولىڭىزدىكى قۇرئاننىڭ نۇرلۇق ئالماس قىلىچى بىلەن كەلدىڭىز. بارلا تۆپىلىكىگە چۈشتىڭىز. دىنسىز پەلسەپە ۋە تەبىئەتپەرەستلەرنى بويۇن ئەگدۈردىڭىز، تىز چۆكتۈردىڭىز. بارچە قارا ئىدىيەلىكلەرنى مات قىلىپ بولشىۋىزم، سىيونىزم (يەھۇدىيپەرەسلىك) ۋە ماسونلارنىڭ بەللىرىنى، قايتا تىكلىنەلمەيدىغان دەرىجىدە سۇندۇردىڭىز.

  ئىمان ئەھلىنىڭ ئىمانىنى تەھقىقىي ئىمان دەرىجىسىگە يۈكسەلتىپ، ئەبەدىي زۇلمەت ئورنىغا ئەبەدىي سائادەتنى تەمىن قىلىش ئۈچۈن جانابى ھەقنىڭ سىزنى ۋە سىز ئارقىلىق نۇرلارنى ئېھسان قىلغانلىقىغا ھېچبىر شۈبھىمىز قالمىدى. سىزنى ھەزرىتى پەيغەمبىرىمىزنىڭ (ئە.س.ۋ) يىگىرمىنچى ئەسىردىكى ۋەكىلى ۋە قۇرئان جامائىتىنىڭ قۇتقۇزغۇچىسى دېيىش ئارقىلىق، توغرا بىر ھەقىقەتنى ئىپادە قىلغىنىمىزغا ئىشىنىمىز.

  قۇرئانىمىز، مەمەدان ئەقىللەرنىڭ پەلسەپىسى بىلەن تېخىچە ئىنكار قىلىنىش خالىنىلىۋاتقىنىدا، رىسالەئى نۇر قۇرئاننىڭ ئەينەكدارلىقى رولىنى ئۆتەپ، بىز ئاۋاملارغىمۇ بۇ كىتابنىڭ ﷲنىڭ قانۇنى ئىكەنلىكىنى ۋە پەقەت مۇشۇ قانۇننىڭلا ئەبەدىي سائادەتكە ئېلىپ بارغۇچى بىر رەھبەر ئىكەنلىكىنى ئوپئوچۇق كۆرسەتتى. ئىلگىرى بىلمەيتتۇق، بۈگۈنكى كۈندە چۈشىنىۋاتىمىزكى، ئۇلۇغ دىنىمىز بولغان، ساماۋىي دىنلارنىڭ جەۋھىرى ۋە پۈتۈن روھلارنىڭ غىزاسى بولغان بۇ قۇياشنى ئىنكار قىلغۇچىلارنىڭ دەۋرىدە، شۇنداق بىر ئىدىيە پەيدا قىلغانكى، بۇ پاجىئەلىك ۋە قورقۇنچلۇق ئىدىيەلەر، فىرئەۋنلەردىمۇ ۋە ئەبۇ جەھىللەردىمۇ مەۋجۇت ئەمەس ئىدى.

  بۈگۈنكى كۈنلەردە نەشىر قىلىنغان بۇ «ھايات تارىخى»ڭىزدىمۇ كۆرۈلىدۇكى، سىز ھەزرىتى ئۇستازىمىز بەدىئۇززامانغا قىلىنغان زۇلۇملار، بارلا تۆپىلىكىگە سۈرگۈن قىلىنىشىڭىزدىن باشلىنىپ، تا ئىسپارتا، ئەسكىشەھىر، قاستامونۇ، دېڭىزلى، ئەمىرداغ ۋە ئافيونلارغا سۈرگۈن قىلىنىشىڭىزدا، كۆرىنىشتە دىن دۈشمەنلىرى تەرىپىدىن سۈرگۈن قىلىنغان ئىدىڭىز. ھەقىقەتتە بولسا، مىڭلارچە ئەھلى ئىماننىڭ ۋە ھەق سۆزگە تەشنا مەكتەب ئەھلىنىڭ كۆڭۈللىرىنى پەتىھ قىلىپ قۇتقۇزىدىغان رەببانىي بىر مەمۇر ئىدىڭىز. ھەمدە ئۇلارغا يول كۆرسىتىدىغان ھەقىقىي بىر ئۆرنەك ئىدىڭىز. كەلگۈسى نەسىللەرنى ئەبەدىي ھالاكەتكە مەھكۇم قىلىشنى خالىغانلار، سىز ئۇستازىمىزنى كۆپ قېتىملاپ زەھەرلىگەن بولسىمۇ، ئۇ زەھەرلەر بۇ جىنايەتنىڭ چوڭلىقىدىن ئۈركۈدى. تىرياق ھالىتىگە كېلىپ، ئەھلى كۇفۇر ۋە ئەھلى ئىمان ئۈچۈن، ئۇلارنى بىر–بىرىدىن ئايرىيدىغان ھۆججەت بولدى.

  سىز ھەزرىتى ئۇستازىمىز، بىزگە قۇتقازغۇچ بولۇپ تەيىن قىلىنغانلىقىڭىزدىن، ﷲنىڭ ئىزنى بىلەن دار ياغاچلىرىمۇ بىردىن ئېلاننامە ھۆكمىگە ئۆتكەن ئىدى. ئەنقەرە دەۋاسىدا، قەھرىمان مويسىپىت ۋە ياش ئاكىلىرىمىز، دەسلەپتە مىڭلارچە بولغان، بۈگۈنكى كۈندە مىليونلاردىن ئاشقان تالىپلىرىڭىزنىڭ يۈكسەك خىسلەتلىرىنى پۈتۈن ئىسلامىيەت نامىدىن ئىسپاتلىغان بىردىن ئۆرنەك بولدى.

  ئەنقەرە بىرىنچى ئېغىر جازا مەھكىمىسى ھەيئىتىنىڭ قارشىسىدا، نۇرلۇق قېرىنداشلىرىمىزنىڭ بىرىنچى سوت مەھكىمىسىدە بىز بار ئىدۇق. كونيا شەھرىدىن  رىسالەئى نۇر ئوقۇغۇچى ئۈچ ئايال قاتناشقان ئىدۇق. يۈزلەرچە ئايال ۋە ئەر قېرىنداشلىرىمىز بىلەن، ھەقنىڭ ھەقىقىتىنى كۆردۇق ۋە شاھىد بولدۇق. بىر ئادۋۇكات ئاكىمىز، كىملىكى ۋە كەسپى ھەققىدە سورالغاندا: «رىسالەئى نۇرنىڭ خىزمەتكارىمەن» دېگەن ئىدى. رىسالەئى نۇرنى قانداق تونۇغانلىقىنى سۆزلەپ: «1952–يىلىدا نۇرلار بىلەن تونۇشتۇم. 1954–يىلىدا ئۇنىڭ خىزمىتىگە كىردىم. 1957–يىلىدا ھوقۇق فاكۇلتېتىنى پۈتتۈرۈپ ئۆزۈمنى نۇر خىزمىتىگە تاپشۇردۇم.» دېگەندە كۆزلىرىمىز ياشلارغا تولدى. «ئاللاھ، ئاللاھ!» دېيىشتىن ئۆزىمىزنى توختىتالمىدۇق. سىز ھەزرىتى ئۇستازىمىزدىن ۋە نۇرلارنىڭ خىزمىتىدە بولغان ئاكىلىرىمىزدىن ﷲ رازى بولسۇن.

قەدىرلىك ئۇستازىمىز ئەپەندىم!

  سىزنىڭ مۇبارەك دۇئالىرىڭىزنىڭ ھۆرمىتى بىلەن، جانابى ئاللاھىمىزنىڭ ئېھسان– ئىلتىپاتلىرى بىلەن كونيادا نۇرلارنى ئوقۇيدىغانلار كۈندىن–كۈنگە كۆپىيىۋاتقانلىق خۇشخەۋىرىنى سىز ھەزرىتى ئۇستازىمىزغا يەتكۈزۈش ۋە ئىماننى قۇتقۇزۇش دەۋاسىدىكى زەپىرىڭىزنىڭ شاھىدى بولۇپ، سىزنى تەبرىكلەش شەرىپىنى بىزلەرگە ئاتا قىلغان جانابى ئاللاھىمىزغا ھەرقانچە شۈكۈر قىلساق ئازدۇز. ئىلگىرىكى مەدرىسەئى يۇسۇفىيەنىڭ (يۇسۇف ئەلەيھىسسالامنىڭ مەدرىسىسىنىڭ) بىر مىسالى بولغان تۈرمىلەرنىڭ تۆمۈر توسۇقلىرىنى نۇرنىڭ شولىلىرى بىلەن ئېرىتىپ، ئۇ نۇرلارنىڭ نان كەبى ئۆيلىرىمىزگە كىرىشىگە ۋاستە بولغان خىزمىتىڭىزنىڭ ئەگەشكۈچىلىرىنىڭ مىڭ ئەمەس، يۈز مىڭ ئەمەس، بەلكى مىليونلاردىن ئاشقانلىقىنىمۇ ھەم ئاڭلاۋاتىمىز، شاھىد بولىۋاتىمىز.

  ئۆيلىرىمىزنىڭ بىردىن نۇر مەدرىسىسى بولغانلىقىنى بۇ مەكتۇپىمىز ئارقىلىق بىلدۈرۈش مەقسىتىدە سىز ھەزرىتى ئۇستازىمىزغا دەيمىزكى: سىز مۇشرىكلارنىڭ قولىدىن بىزنى قۇتقۇزدىڭىز. قوللىرىمىزغا بىردىن نىجاتلىق نىشانىسى بولغان ئىمان كىنىشكىسىنى بەردىڭىز. سىزنىڭ خىزمىتىڭىز بىلەن، بىزلەر بۇ ياشلىق ھەۋەسلىرىمىزدىن پارىغ بولۇپ، نۇرلارغا يېپىشتۇق. يۇرتىمىزدىلا ئەمەس، بەلكى پۈتۈن دۇنيادا نۇرلىرىمىز بىلەن بىرگە زەپەرلەر قۇچىدىغانلىقىمىزغا ئىشەنمەكتىمىز. بۇ زەپەر، ﷲقا يۈزلەنگەن نۇرلارنىڭ زەپىرىدۇر. بۇ زەپەر، سائادەت ئەسىرىدە پەيغەمبىرىمىزنىڭ ئاچقان نۇرلۇق يولىدا ماڭغانلارنىڭ زەپىرىدۇر. بۇ زەپەر، ئىمان ئەھلىنىڭ زەپىرىدۇر. غەلىبە ئىسلامنىڭدۇر. مەغلۇبىيەت بولسا، ئۆتكەنكى ۋە بۈگۈنكى دىنسىز گورۇھلارنىڭدۇر. ئىمانلىق كۆڭۈللەرنى ھېچبىر قۇۋۋەتنىڭ مەغلۇپ قىلالمايدىغانلىقىغا، پۈتۈن دۇنيا شاھىد بولماقتىدۇر. رىسالەئى نۇرنىڭ ئىمان خىزمىتىدىكى زەپىرى، بۇنى يەنە بىر قېتىم كۆرسەتتى.

  سىز بولمىغان بولسىڭىز، بىز بۇ ئەسىرنىڭ رىياكارلىقتىن ئىبارەت فانىي زىننەتلىرىنى، مەدەنىيەت ئەسىرىنىڭ تەلەپ قىلغانلىرى دەپ، ئاللىبۇرۇن قەلبلىرىمىزگە يەرلەشتۈرۈپ، روھلىرىمىزنى ئالماس سەۋىيىسىدىن پاسكىنا كۆمۈر ماھىيىتىگە چۈشۈرگەن بولاتتۇق. جانابى ھەق سىزنىڭ ۋاستىڭىز بىلەن بىزلەرگە نۇرلىرىمىزنى ئېھسان قىلغانلىقىدىن، نۇرلىرىمىزنىڭ يورۇقىدا ئۇ زۇلمەتلىك كېچىلەرنى ۋە ئۇ ھىيلىگەرلەر مەدەنىيىتىنىڭ چىركىنلىكلىرىنى ئوپئوچۇق كۆرەلەۋاتىمىز. ئاللاھىمىزنىڭ بۇ ئىنايىتىگە ھەمدۇ–سانالار ئېيتىمىز.

  بۇ ئەسىرنىڭ نەقەدەر قورقۇنچلۇق ۋە نەقەدەر دەھشەتلىك بىر ئەسىر ئىكەنلىكىنى كۆرەلىشىمىز ئۈچۈن، پەقەت ۋە پەقەت تەھقىقىي ئىماننىڭ دۇربۇنى بىلەن كۆرۈشىمىز كېرەك ئىكەن. ئىمان دۇربۇنىنى قەلب ۋە كۆزلىرىگە تاقىمىغانلارنى، كەيپ–ساپالارنى پەزىلەت قىلىپ كۆرسەتكەن بۇ مىمسىز مەدەنىيەتنىڭ^* زالالەت پاتقاقلىقلىرى يۇتىۋېتىشى مۇمكىن دېگەن ئىدىيە بىلەن، بىز نۇر شاگىرتلىرى بەكمۇ مەيۈسلىنەتتۇق. ئەمما نۇرلارنىڭ

  ياۋروپالىقلارنىڭ روھلىرىغىمۇ كىرىپ، كۈندىن–كۈنگە ئۇلارنىڭ كەيپ–ساپالىرىنى تازىلاۋاتقانلىقىنى كەلگەن مەكتۇپلاردىن بىلىۋاتىمىز.

  بىزلەر بولساق، بۈگۈن ئىمانىمىزنىڭ نۇرى بىلەن دەيمىزكى: ئەي يىگىرمىنچى ئەسىرنىڭ مەدەنىيەت ئەسرى ئىكەنلىكىنى دەۋا قىلغان دىنسىز پەلسەپە! دىنسىز، تەبىئەتپەرەس ماسونلار ۋە قىزىل بولشىۋىكلار! سىلەرگە بۇ ۋەتەننىڭ گۈزەل تۇپراقلىرىدىن ۋە ئوتتۇرا ئاناتولىيەدە ھەزرىتى مەۋلانانىڭ يۇرتىدىن ۋارقىراپ دەيمىزكى: «بىزلەر ھەزرىتى مۇھەممەدنىڭ (ئە.س.ۋ) ئۈممىتى، مەۋلانانىڭ نەۋرىلىرى ۋە بەدىئۇززامان سەئىد نۇرسىنىڭ تالىپلىرىمىز. سىلەرمۇ بىزلەرنى ياخشى تونۇۋېلىڭلار. سېنىڭ مەدەنىيىتىڭنى ئۆتمۈش مازارىستانىغا كۆمۈۋەتتۇق. ئۇنىڭ ئورنىغا بەكمۇ يېڭى يىگىرمە بىرىنچى ئەسىرنىڭ قۇياشى تۇغۇلۇش ئالدىدا تۇرماقتا. بۇ قۇياش ئىسلامنىڭ قۇياشى، نۇرلارنىڭ قۇياشى ۋە ھەمدە رىسالەئى نۇرئوقۇغۇچىلارنىڭ قۇياشى بولۇپ تۇغۇلىدۇ، ئىنشائاللاھ.»

  ھەزرىتى ئۇستازىمىز! شۇ قۇسۇرلۇق تىلىمىز ئارقىلىق، سىز بىلەن بىرلىكتە ئىمان يولىدا، ﷲ يولىدا، قۇرئاننىڭ رەھبەرلىكىدە ھەقنىڭ ھەقىقىتىنى قۇبۇل قىلغانلىقىمىزنىڭ بىردىن ھۆججىتىنى بايان قىلىش بىلەن، بۇ ئەسىرنىڭ ئەڭ بەختىيار كىشىسى بولغانلىقىمىزغا ئىشىنىمىز. چۈنكى بۈگۈنمۇ يەنىلا بىر تالىپ نەزىرىدە قاراۋاتقان شۇ فانىي ۋۇجۇدىڭىز، ﷲنىڭ دەرگاھىدا، بىزلەرنىڭ يېنىمىزدا ئەبەدىيدۇر. چۈنكى مەرىفەتۇللاھنى كۆزلىگەن قەلبلىرىمىز ئىمان قۇۋۋىتى بىلەن سوقماقتا. بۇ قۇۋۋەت بىزلەرنى ﷲ يولىدىن، سەييىدىمىز پەيغەمبىرىمىز رەسۇلى ئەكرەم ئەلەيھىسسالاتۇ ۋەسسالامنىڭ رەھبەرلىكىدىن، نۇرلىرىمىزدىن ئايرىمايدىغان ئىلاھىي بىر قۇۋۋەتتۇر، ئىنشائاللاھ.

  ﷲنىڭ ئىزنى بىلەن، قەلبلىرىمىزگە رىسالەئى نۇر ۋە نۇرلىرىمىز بەرگەن پەيزلەر بىلەن بۇ مەكتۇپنى يازدۇق. سىز ئۇستازىمىزنى بىتاپ ھالىڭىزدا ئوشۇقچە مەشغۇل قىلغىنىمىزدىن، قۇسۇرلىرىمىزنى ئەپۇ قىلىشىڭىزنى ئايرىم–ئايرىم ئۈمىد قىلىپ، جانابى ﷲتىن شىپا تىلەيمىز، ھەمدە مىراج كېچىڭىزنى مۇبارەكلەيمىز.

اَلْبَاقِى هُوَ الْبَاقِى

دۇئالىرىڭىزغا تولىمۇ مۇھتاج بولغان كونيا شەھرىدىكى خانىملار نامىدىن:

گۈلسۈن، ئالماس، فىردەۋس، مەدىھە، ئائىشە،

خەدىچە، فاتىمە، سالىھە، شۈكران، مۇشەررەف،

زەھرا، ئائىشە، نۇران

————————————————–